ÁTVR

Um daginn lögðu nokkrir þingmenn fram frumvarp um afnám á einkasölu ríkisins á áfengi. Ekki varð frumvarpið þó að lögum en látið var í veðri vaka að andstaða Vinstri grænna hefði verið helsta ástæða þess. Nú veit ég að margir þungavigtarmenn innan VG eru á móti slíkum breytingum en er það ekki svolítil einföldun að þeir geti einir komið í veg fyrir þetta. Eitthvað segir mér að andstaðan við slíkar breytingar eigi rætur víðar enda hefur Sjálfstæðisflokkurinn verið við völd í 16 ár án þess að slíkt frumvarp hafi verið lagt fram af e-alvöru. Þar af eru 12 ár með flokki sem hefur hægri og vinstri fót og stígur í þann sem hentar hverju sinni. Ætli þetta frumvarp hefði þá ekki runnið í gegn ef fyrir því væri raunverulegur áhugi hjá meirihluta á Alþingi.

Að sjálfsögðu á maður að geta hlaupið út í 10-11 hinum megin við götuna og náð í bjórkippu eða rauðvínsflösku þegar gesti ber að garði. En það eru nokkur atriði sem mér finnst ósvöruð.

Í fyrsta lagi langar mig að vita hvort ég muni bara geta fengið Lambrusco, Budweiser og Bláu Nunnuna í 10-11 eða verður stórgott úrval víðsvegar.

Í öðru lagi hef ég hvergi fengið svör við því hvort verðið verði svipað. Ein aðalástæðan fyrir háu verði á áfengi hér á landi er vegna tolla-og áfengisgjalds. Það er ósennilegt að þessi gjöld verði afnumin og er þá ekki alveg jafn líklegt að verðið hækki. Vissulega kemur e-r samkeppni til sögunnar en höfum við reynslu af því að samkeppni á Íslandi keyri niður verðið?

Ég man þegar ég var lítill og fór stundum með pabba í ríkið. Það var alltaf fullt af fólki inni sem gargaði eins og fýlar í fuglabjargi á einkennisklædda, geðilla ríkisstarfsmenn sem hlupu á eftir vodka-og ginpelum og afgreiddu þá svo yfir borðið í brúnum bréfpokum.

Síðan eru liðin allmörg ár og þjónustan hefur batnað mikið. Ég held jafnvel að úrvalið í ÁTVR sé nokkuð gott, a.m.k. öðru hverju. Ég fer hins vegar afspyrnusjaldan í vínbúð og er því varla sérfræðingur á þessu sviði.

En segjum sem svo að verðið muni hækka og þjónustan muni aðeins batna hvað varðar kaup á bandarískum Budweiser í 10-11, fyrir hvern er maður þá að berjast fyrir breytingunni. Baug?

Með fullri virðingu fyrir því fyrirtæki þá held ég að ég muni ekki leggja mikla áherslu á þetta atriði í komandi kosningum nema ég fái svör við ofangreindum spurningum.

Góu gæinn

Stórkostlegur maður, Helgi í Góu.

Hann er sennilega formaður félags andúðar á sérfræðingum að sunnan, ASAS, ómenntaður harðjaxl sem byggði viðskiptaveldi sitt frá grunni með blóði, svita en ekki tárum því svona kallar grenja ekki eins og aumingjarnir í viðskiptafræðinni!!

Ég sá viðtal við hann í Fréttablaðinu þar sem hlakkaði í honum yfir lánleysi fjármálaráðherra, eftir að hann seldi hlut sinn í Sparisjóði Hafnafjarðar á 50 milljónir í fyrra en hefði getað fengið 200 milljónir núna. Helgi þykist hins vegar góður og ætlar að senda öllum sem voru svo vitlausir að selja í fyrra, hraun og kók í sárabætur. Góu gæinn stóð hins vegar í báða fætur og beið enda veit hann sennilega alltaf betur. Kannski er hann klárasti maður Íslands.

Nú er ég enginn sérstakur aðdáandi fjármálaráðherra en mátti hann ekki bara selja í friði. Er líf hans e-ð verra þó hann hafi orðið af 150 milljónum? Og ef það er verra er þá ekki eðlilegra að hann fái að bera þann harm sinn í friði án þessi að sælgætisbarónar í Hafnarfirði séu að strá salti í sárið.

Ég ætla að vona að þetta verði ekki framtíðarsiður þeirra sem græða á viðskiptum. Verður sá sem selur á fasteignina sína á lágu verði eða kaupir á háu athlægi. "Hvað ertu að segja, keyptirðu húsið á 50 milljónir? Ég keypti betra hús á 30 milljónir fyrir þremur árum, hí á þig? En ég ætla að bjóða þér upp á Seven Up og Snickers, fyrst þú ert svona mikill hálfviti".

Ég verð hins vegar að viðurkenna að ég væri alveg til í 150 milljónir og jafnvel bara 50 milljónir. Ég myndi ekki einu sinni segja nei við 5 milljónum. Ég er meira að segja til í hraun og kók. Helgi, ég er í símaskránni ef þú vilt senda mér e-ð.

 

 

 

Bull

Í dag urðu íþróttaáhugamenn vitni að einni af ógeðfelldari hliðum handboltans. Fyrir marga kom þess sjón verulega á óvart en þeir sem til þekkja vita að vandamálið hefur verið til staðar í nokkurn tíma og nefnist einu nafni handboltabullur.

Mönnum er eflaust enn í fersku minni þegar harðsvíruðum hópi stuðningsmanna Fram sem kallar Fylkinguna, og hörðum kjarna stuðningsmanna KA, sem kallar sig Páskaungana, lenti saman á kaffihúsinu Bláu könnunni á Akureyri. Bárust lætin þaðan yfir á Ráðhústorgið, þar sem lögreglan þurfti að kalla til liðsauka frá DAlvík og Árskógsströnd, til að hemja verstu bullurnar. Þá hefur lögreglan í Reykjavík margsinnis þurft að hafa afskipti af miskunnarlausum stuðningsmannahópi Vals, sem kallar sig Rauða kverið. Er þar einkum um að ræða róttæka menntaskólanema úr Hamrahlíð. Ekki er vitað um fleiri skipulagða bulluhópa en vitað er að í Vestmannaeyjum er ein skæð bulla. Svo skemmtilega vill til að hún er einnig stjórnarmaður í ÍBV. Þá er formaður handknattleiksdeildar Stjörnunnar í bullinu en það er önnur og eldri saga.

Rekja má þetta vandamál til handboltans sjálfs. Segja sálfræðingar og atferlisfræðingar sem rannsakað hafa málið að alls kyns atriði sem tengjast íþróttinni sjálfri leiði til sturlunar hjá þeim sem haft hafa gaman af. Er þar einkum um að ræða þá staðreynd að það tapar enginn í handbolta vegna verri leiks. Ástæðan er yfirleitt sú að dómarinn lét liðið tapa, eftirlitsdómarinn var ekki á staðnum, eftirlitsdómarinn var á staðnum en það hafði enginn eftirlit með honum, HSÍ lagði vísvitandi erfiðara leikjaprógram fyrir tapliðið og síðast en ekki síst þá senda dómarar allt of háan reikning fyrir þjónustu sína.

Afleiðingin er hins vegar sú að hinn almenni borgari þorir ekki lengur á leiki af ótta við bullurnar sjálfar. Handboltaleikir eru því spilaðir fyrir hálftómu húsi.

Er nema von að handboltinn sé í ruglinu. 

http://dagskra.ruv.is/streaming/sjonvarpid/?file=4338238/0

Aldrei einn á röltinu

Það er örugglega gaman að vera stuðningsmaður Liverpool. Tilheyra stórum hópi eins og hjörð og sitja á Ölveri með gleðitárin lekandi niður kinnarnar meðan falskasti fjöldakór veraldarsögunnar kyrjar afspyrnulélegt lag með Gerry and the pacemakers.

Ég vil nú ekki vera of dómharður, þessi tilfinning gefur örugglega góða gæsahúð en getur e-r útskýrt fyrir mér hvers vegna stuðningsmenn liðs sem kemur frá heimabæ Bítlanna, völdu lag með hljómsveitinni sem söng Ferry across the Mersey?

Þetta er svipað og segja, "Nei, veistu ég fíla ekki Godfather en The Whoopee Boys er frábær ræma".

Stoltur

Getur maður verið stoltari a stelpunum sínum?

 

 

Bókamarkaður

Skellti mér á bókamarkaðinn í dag. Sennilega er 90 % bókanna lítið spennandi á slöppum díl. En það er vel þess virði að leita hin 10 % uppi og við fundum nokkrar góðar. Aðallega barnabækur en e-ð um kiljur eftir erlenda höfunda sem Bjartur hefur verið að gefa út.

Einn gullmoli skar sig þó úr. Um er að ræða nokkur tölublöð af Brandarablaðinu sem ég hef ekki séð í fjölda ára. Ég kannaðist strax við fjöldann allan af bröndurum en eins og menn muna kannski gekk blaðið aðallega út á ljósbláan húmor, gamla dónakalla og þrýstnar stúlkur, smádrengi að fylgjast með hegðun foreldra í svefnherberginu og svo mætti lengi telja.

BRANDARABLAÐIÐ, Glens er gulli betra, vafasamir brandarar.

Það eru svona forsíður sem selja!

Í karakter

Einn er sá ósiður sem hefur heltekið fréttatíma og dægurmálaþætti, einkum í sjónvarpinu. Um leið og hann er borinn á borð fyrir áhorfendur, engist maður í sófanum og reynir að teygja sig í fjarstýringuna. Sé hún ekki í sjónmáli geta afleiðingarnar verið alvarlegar, allt frá lamandi bjánahrolli upp í mjög slæma líkamlega áverka eftir að maður hefur skallað stofuvegginn ítrekað til að losna undan hryllingnum.

Ég er að sjálfsögðu að tala um viðtal við leikara sem er "í karakter". Hver er það sem tekur ákvörðun um að bjóða blásaklausum áhorfendum upp á Jóa úr Jóa&Góa tala Oxford ensku í viðtali eða áhugaleikara úr Kvennó þykjast vera 19. aldar hefðarfólk í Kastljósinu . Er það leikarinn sem telur þetta góða auglýsingu sem gefi áhorfandanum möguleika á að færast nær verkinu? Eða er það sjónvarpsmaðurinn sem haldinn er þeim ranghugmyndum að það sé e-r von í helv... að samræður milli hans og leikarans geti e-n tíma talist eðlilegar? Stutt heimatilbúið dæmi:

Fréttamaður: Ég er hér með Hamlet hjá mér. Hamlet, segðu mér, hvernig ertu núna?

Hamlet (t.d. Atli Rafn Sigurðarson í búningi með dramatískri, tilgerðarlegri leikhúsrödd) : Að vera eða vera ekki, það er spurningin!

Ef maður er ekki búinn að stoppa þarna er hætta á ofangreindum áverkum.

Kæra sjónvarpsfólk! Ég bið ykkur um að láta af þessum ósið nú þegar. Ef leikarar kjósa að halda þessum skrípaleik áfram finnið þá einhvern annan til að tala við. Jafnvel ljósamanninn eða hvíslarann, svo lengi sem það er allt annað en leikari "í karakter".

Ef hins vegar gengur illa að finna eldri "í karakter" upptökum hlutverk vil ég benda á að þær eru væntanlega ómetanlegar fyrir leyniþjónustur og glæpasamtök. Gamlar pyntingaraðferðir eins og raflost í eistun verður barnaleikur í samanburði. Upptaka af Jóa, mínus Gói, eða Þjóðleikhúsálfinum "í karakter" mun opna flóðgáttir leyndarmála og upplýsinga, jafnvel hjá harðsvírustu glæpamönnum heims.

Nokkur orð um klám

Ég ætla nú ekki að fá þetta á heilann en andstaða Íslendinga við ákvörðun Bændasamtakanna hefur komið mér á óvart. E-a hluta vegna hefur þessu umræða snúist annars vegar um hvað femínistar eru vondar og frekar og hins vegar hvað klám sé eðlilegt og í miklu samræmi við frelsi einstaklingsins til að taka eigin ákvarðanir.

Í fyrsta lagi hafa femínistar eins og aðrir rétt á að tjá skoðun sína og hatrið gangnvart þeim er oft á tíðum undarlegt. Sumt af því sem þær/þeir segja og gera orkar tvímælis og oft erfitt að vera sammála aðferðafræðinni en stundum er eins og nýnasistar séú á ferð, slík ofsafengin viðbrögð vekja aðgerðir þeirra.

Í öðru lagi þá var þessum hóp ekki bannað að koma til Íslands enda er slíkt vald hvorki í höndum femínista né bænda. Þetta var ákvörðun sem var tekin af eigendum hótelsins m.a. vegna vanþóknunar yfirvalda. Ég er ekki frá því að þeir sem sjá eftir þessum hópi verði að beina gremju sinni að fleirum en feministum enda hafa aðgerðir þeirra ekki fengið jafn skjót viðbrögð áður, að mig minnir. Kannski eru flestir borgarfulltrúar einfaldlega ekki hrifnir af klámi og telja slíka ráðstefnu ekki æskilega burtséð frá skoðunum femínista. Það er þá alltaf hægt að kjósa þann sem lofar fullu fundafrelsi fyrir næstu kosningar.

Í þriðja lagi var þetta ekki partý eða tilvijanakenndur hittingur. Þetta átti að vera ráðstefna þar sem menn eru að koma á viðskiptasamböndum og jafnvel útbúa klámefni. Skiptir kannski ekki öllu máli en aðalatriðið er að það var engum bannað að koma til landsins. Ég hef alla vega ekki heyrt á það minnst að lögregla biði á Leifsstöð og meinaði þessum aðilum komu til landsins.

Í fjórða lagi efast ég ekki um að mikið af því efni sem ráðstefnugestir framleiða er fullkomlega löglegt hér og þar, leikararnir gera þetta af fúsum og frjálsum vilja og engin vandamál. Það á að vera hverjum þeim, sem svo kýs, að vera heimilt að horfa á slíkt efni og framleiða það. Tiltölulega erfitt að vera á móti því eða rökstyðja hvers vegna hver og einn má ekki hafa um þetta val. En þá verður að vera um eðlilegt val að ræða. Versti glæpurinn verður þá væntanlega að manni hættir til að vera helv... hallærislegur.

Það sem verra er snýr að öðru, og þá er ég ekki að tala um vændi og neyð. Inni á þessum síðum, sem nefna má klámmiðlanir, er mjög oft að finna efni þar sem barnalegar stúlkur eiga í samræði við menn sem virðast vera eldri og oft eru þær merktar t.d. með hárbandi að þær séu "Teens". Í slíkum tilvikum skiptir engu máli hvort viðkomandi "leikkona" er 18 ára, tilgangurinn er að gefa þá mynd að um ungling sé að ræða.

Svo er fólk hissa á að MSN-ið sé fullt af mönnum sem vilja komast í kynni við unglingsstúlkur. Svona efni vekur einfaldlega upp afbrigðilegar kenndir eða geta gert það. Til hvers að vera að berjast fyrir því að slíkar myndbirtingar séu látnar óáreittar? Að ætla að mótmæla þessu er eins og að nota gamlan NRA frasa um að byssur drepi ekki fólk, það geri menn. Þau rök hef ég aldrei keypt.

Það sem eftir stendur er að hér á landi er skoðanafrelsi og réttur til að tjá skoðun sína sem flestir hafa nýtt sér. Eigendum Hótel Sögu var einnig heimilt að afbóka en hvort þeirri verði skaðabótaskyldir vegna þess verður að koma í ljós. En það er ekki endalaust hægt að verja rétt dónakalla til að skoða efni af stúlkum sem líta varla út fyrir að vera kynþroska. Það hljóta allir skynsamir menn að vera sammála um.

Fagnandi

Ég var að horfa á myndir úr leik Reading og Man Utd þegar það rifjaðist upp fyrir mér hvað Ole Gunnar Solskjaer fagnar mörkum sínum asnalega. En það eru fleiri slæmir og því tilvalið að setja upp lista af lélegum fögnum:

1. Ole Gunnar Solskjaer: Litli Norðmaðurinn með barnsandlitið virðist bara hafa tök á því að fagna með munninum en gerir það með stæl. Þegar boltinn hefur farið yfir línuna  festist munnurinn í þvílíkri brosgeiflu að maður gæti að haldið að til stæði að fæða 22 marka barna með munninum. Með bros á vör.

2. Thierry Henry: Ég hef áður minnst á "ég er svo ógeðslega góður og kúl" fagnið hans Henry en ég sá Saha taka sambærilegt fagn í Reading leiknum. Kannski er þetta franskur andskoti en breytir því ekki að þetta er verulega vont.

3. Pippo Inzaghi: Þessi leikmaður er óþolandi fyrir margra hluta sakir og ekki síst fyrir "hauslaus kjúklingur fær raflost" fagnið þar sem hann hristist og skelfur á hlaupum líkt og hann sé í dauðateygjunum.

4. Hörður Magnússon: Einn gamall en fyrir ca. 15-16 árum fagnaði þessi spræki sjónvarpsmaður eins og taktlaus, valhoppandi flóðhestur. Afspyrnuvont.

5. Alan Shearer: Með algert trademark. Boltinn kominn inn, best að setja upp kryppu, aðra hendina upp til hálfs með flötum lófa og hlaupa svo hálfan völlinn með liðið á eftir sér. Er Richard Nixon hefði verið fótboltamaður hefði fagnið hans verið svipað í "I´m not a crook" stíl.

6. Eiður Smári: Ég veit að þetta eru helgispjöll en ég fæ alltaf nettan aulahroll þegar okkar maður tekur "Gjörið þið svo vel, þetta var í boði Eiðs Smára" fagnið.

7. Guðmundur Ben: Þar sem Valsarinn spræki er enn í fullu fjöri verð ég að minnast á fagnið þar sem hann krýpur eins og riddari, kreppir hnefa og gerir svona slow motion sigurhreyfingu með annarri hendinni. Erfitt að lýsa þessu en þeir sem hafa séð þetta vita hvað um ræðir.

8. Bubbi: Ekki fótboltamaður en slow motion boxhreyfingin sem hann gerði þegar hann vann verðlaun á Íslensku tónlistaverðlaununum verðskuldar að minnst sé á það.

9. Eyjamenn: Eyjafögnin urðu fljótt jafn þreytt og Silvía nótt í Júróvisjón.

Man ekki eftir öðrum í bili en lesendur mega gjarnan koma með tillögur.

Netlögregla

Það er allt vitlaust vegna þess að Steingrímur J. sagði að hann væri fylgjandi því að sérstök netlögregla ætti að starfa með það að markmiði að uppræta klám og annað sambærilegt og væntanlega verra efni. Ég held að Steingrímur ætti að fá tækifæri til að útskýra betur hvað hann á við áður en menn fara að nota frasa eins og að Stóri bróðir sé kominn á kreik. Kannski getur hann útskýrt þetta á skynsamlegan hátt en það gæti líka verið að um sé að ræða vonda hugmynd sem gæti tætt fylgi af flokknum. Ég held að almennt séu Íslendingar lítið hrifnir af lögregluvaldi enda er auðveldlega hægt að misbeita slíku valdi hvort sem um netlögreglu eða annars konar lögreglu er að ræða.

Ég held að upphlaupið vegna orða Steingríms sé hins vegar að miklu leyti byggt á mikilli vanþekkingu á internetinu. Fólk virðist ennþá haldið þeim ranghugmyndum að vegna þess að internetið er tiltölulega flókið kerfi án landamæra gildi þar engar reglur. Bak við allt efni sem sett er inn á netið er manneskja af holdi og blóði hvort sem um er að ræða þann sem sendir út eða tekur við. Vegna þess að allar aðgerðir fara fram í óáþreifanlegu rými virðast jafnvel skynsömustu menn telja að þeim sé allt heimilt. Það skýrir kannski hvers vegna meirihluti háskólanema og fleiri sjá ekkert athugavert við það að hala niður gríðarlegu magni af bíómyndum og sjónvarpsþáttum án endurgjalds, en einstaklingar í sama hópi myndu ekki láta það hvarfla að sér stela sama efni í DVD hulstri í Skífunni. Ég held hins vegar að flestir viti að verðið er ekki tilkomið vegna disksins eða hulstursins. Það er verið að selja hugverkið.