Auðmenn Íslands

Það er ekki laust við að ég sé þreyttur á að heyra sögur af plebbaskap íslenskra auðmanna. Nú síðast óðu e-r FL Group plebbar inn á tónleika Noruh Jones á skítugum skónum, skvaldrandi og pinnahælaglamrandi þegar hún var byrjuð að spila, reyndar með upphitaranum. Nú skiptir kannski ekki öllu hvort þetta var Norah Jones eða e-r annar en það hljóta flestir að vera sammála um að lágstemmd tónlist má síður við svona brölti.

Tapar maður allri tillitsemi, kurteisi eða klassa við það að eignast einn milljarð? Eða er ástæða þess að maður getur yfirhöfuð eignast milljarð sú að mann skorti tillitsemi, kurteisi og klassa til að byrja með, og því sé auðveldara að vaða yfir allt og alla á skítugum skónum.

Annars er athugunarefni af hverju íslenskir auðmenn láta oft á tíðum eins og nýríkir Rússar. Sorrý Sævar en það er e-ð rússneskt við að vera alltof fullur í flugvél flugfélags sem maður á sjálfur og það er líka dálítið rússneskt að leigja Royal Albert Hall undir Stuðmenn. Þá er ekki síður rússneskt að borga tónlistarmönnum nokkur hundruð þúsund fyrir að spila Nínu, aftur og aftur. Og á maður að þora að segja að það sé dálítið rússneskt að efnast verulega á verksmiðju í St. Pétursborg eða kaupa fótboltalið í Englandi. En þetta síðasta þarf ekki að vera vont, bara dálitið rússneskt.

Man U2

Vinur minn hringdi brjálaður í mig og kvartaði undan því að verið væri að gera lítið úr Guns´n´roses á síðunni. Bætti við að það vantaði bara U2 á listann og þá væri ég búinn að opinbera apaköttinn í sjálfum mér. Mér til varnar vil ég segja að U2 sleppur alveg, Bono og félagar hafa gert margt gott í gegnum tíðina þó ég slefi ekki yfir hverju lagi. En Guns´n´roses eru bara leiðinlegir.

Þetta minnti mig á frábæra grein eftir Hallgrím Helgason, sem birtist í DV fyrir nokkrum árum. Þar fullyrti hann að frjálslyndi væri orðið svo mikið að gera mætti grín að öllu; forseta Íslands, Guði, Jesús, minnihlutahópum og öryrkjum. Þrátt fyrir þetta væri tvennt í þessu þjóðfélagi sem ekki mætti gera grín að, annars vegar Manchester United og hins vegar U2. Rökstuddi hann þetta með dæmisögu þar sem hann sat í litlu plássi úti á landi og horfði á evrópuleik með Man Utd.  Þrekvaxnir togarjaxlar sátu allt í kringum hann í Manchester peysum og létu brandarana fljúga meðan á leiknum stóð. Snerust þeir oftar en ekki um ofangreind brandaraefni. Þá ákveður Hallgrímur að leggja sitt af mörkum og segir: "Hvernig er það með Cole og Yorke, eru þeir ekki hommar!?". Þá sló þögn á mannskapinn og Hallgrími mættu þvílík drápsaugnaráð, sem gáfu greinilega til kynna að hans nærveru væri ekki óskað frekar.

En hvernig er það, ég heyrði að Voronin og Torres væru e-ð að digga. Ég vissi reyndar alltað að Torres spilaði í hinu liðinu en Voronin kemur mér á óvart.

Samviskuspurning

Fyrst maður er búinn að opna Pandóruöskjuna. Fyrir ári síðar var ég spurður að því hvaða lög ég skammaðist mín fyrir að fíla. Hér eru þrjú:

1. Feel með Robbie Williams: Ég veit ég veit, Robbie er ólæknandi hrokagikkur sem heldur að hann sé óskilgetið afkvæmi Elvis Presley og James Bond. Kannski hefur mágur minn í Silkeborg haft e-ð um þetta að segja en þetta er ekki slæmt popp. Alla vega ekki í mínum eyrum.

2. Sail away með David Gray: Það er ekkert kúl og ekkert hip að finnast David Gray skemmtilegur. Ekki nóg með að hann sé 99% leiðinlegur þá er hann sláandi líkur Hellisbúanum. En ég veit ekki, mér finnst þetta lag bara helv.. gott.

3. Dragonsta din tei með Ozon: Ég er að verða aðeins of gamall til að hafa gaman af austurevrópsku hommateknói en þetta lag kemur manni í fílinginn. Eða hefði allavega gert það á Ibiza fyrir 15 árum.

Það væri gaman að fá lista frá þeim lesendum sem þora.

Af leiðindum

Það eru allir að koma út úr skápnum og ég get ekki verið minni maður. Ég er sammála Magna, Agli Helga og Dr. Gunna: Tom Waits er skelfilega leiðinlegur. Og fyrst svona játningar eru komnar fram þá vil ég líka lýsa því yfir að The Clash er skelfilega ofmetin sveit, Fræbblarnir eru tónlistarlegur eyrnamergur (kerfisfræðingar verða ekki töff þó þeir noti orðið ríða) og Sex Pistols eru álíka merkilegir á tónlistarlistarsviðinu og Víðir Garði á fótboltasviðinu.

En þetta mat er ekki klippt og skorið frekar en annað. Eitt leiðinlegasta lag allra tíma er "Keep on rockin in the free world" með Neil Young. Eitt besta lag allra tíma er eftir sama mann og er í spilaranum hér til hliðar.

Antonio Puerta

Það er misjafnt hvernig maður tekur andlátsfréttum utan úr heimi. Þegar fimmtíu manns látast í sjálfsmorðssprengjuárás í Írak, staldrar maður aðeins við til að íhuga mannvonskuna og viðbjóðinn í heiminum, en heldur svo áfram með hversdaginn. Eftir því sem dauðinn þokast nær landfræðilega verða viðbrögðin sterkari, ekki síst þegar dauðinn er kominn með nafn og andlit. Eitt andlát getur því orðið mun sorglegra en dauði hundruða.

Vissulega felst í þessu mikil hræsni en svona er þetta nú samt. Gott ef það var ekki Stalín sem sagði að dauði eins manns væri sorg en dauði þúsunda tölfræði.

Svona líður mér akkúrat núna. Hinn 22 ára gamli leikmaður Sevilla og spænska landsliðsins, Antonio Puerta, lést á spítala í Sevilla í dag eftir að hafa fengið hjartaáfall í leik með Sevilla um helgina. Til að gera örlög þessa unga leikmanns en sorglegri er kærastan hans komin sjö mánuði á leið. Þó Puerta hafi kannski ekki verið mjög frægur utan Spánar var hann engu að síður lykilmaður í öflugu liði Sevilla. Það kæmi mér ekki á óvart þó tár Sevillabúa hækki yfirborð Guadalquivir árinnar, sem rennur í gegnum borgina, enda eru þeir frægir fyrir miklar tilfinningar og blóðhita. Myndir frá borginni sýna jafnvel stuðningsmenn Betis gráta á götum úti en milli þessara tveggja liða hafa verið litlir kærleikar í gegnum tíðina.

Það sem mér finnst hins vegar alvarlegast og jafnvel óþægilegast er sú tilhugsun að maður á besta aldri og í toppformi skuli geta hnigið niður og látist án nokkurs aðdraganda. Það muna margir eftir Marc Vivien Foe, sem lést í miðjum leik með Kamerún, en einnig Miklos Feher, leikmanni Benfica, sem féll eins og drumbur aftur fyrir sig eftir að hafa gantast við dómarann.

Ef slíkir menn eru ekki óhultir í augnablikinu fyrir Grimma garðsláttumanninum, hvað með okkur hin?

Ekki síðri

Ég ákvað að tína til nokkur mörk sem eru í raun ekki síðri en flest markanna sem komust á topp 20.

Hugo Sanchez: Einstakur markaskorari sem reyndi að strá örlitlu glimmeri yfir allt sem hann gerði ef hann gat. Þetta er frábært mark og í raun ekki síðri hjólhestaspyrna en hjá Rivaldo og Basten.

http://www.youtube.com/watch?v=IDakJ9xCK-g

Butragueno: Snillingur sem ég hélt mikið uppá á þessum árum. Átti nokkuð langt í land með að ná markafjölda Hugo og var því ekki eiginlegur potari eins og Gamms nafngiftin gaf til kynna en var með einstaka boltatækni eins og þetta myndband sýnir. Fyrstu gabbhreyfinguna verður að sýna hægt svo maður átti sig á henni. Hrikalega einfalt en fáum gefið.

http://www.youtube.com/watch?v=IEAGL-VsUZM

Carlos: Ég er eiginlega hissa á því að þetta mark sé ekki á 20 marka listanum þó um hálfgerðan æfingaleik sé að ræða. Krafturinn, snúningurinn og fjarlægðin. Frábært mark.

http://www.youtube.com/watch?v=Vi2zjG_d6oQ

Carlos: Annað alveg frábært frá Carlos. Aftur er það kraftur, snúningur og fjarlægð en nú frá endamörkum.

 http://www.youtube.com/watch?v=KNs4w2k6qNo&mode=related&search=

Basten: Fræg hjólhestaspyrna. Mjög gott mark en vantar þetta magic touch sem markið á móti Sovétmönnum hefur.

http://www.youtube.com/watch?v=0O2nEZAb_Mk

Belanov: Þetta er fyrir Sævar og hans misskildu sovésku snillinga. Þetta er alveg frábært mark því hann nær að smella boltanum 100 %. Pfaff, sem ekki var amalegur markvörður, sagði víst að þetta væri eins og F16 orrustuvél á fullspítt.

http://www.youtube.com/watch?v=-QvXaqjshmk

Rats: Annað gott en samt ekki eins flott og Belanov markið. Flott skot en ekki beint einstakt.

 http://www.youtube.com/watch?v=NqG9AdVXQBQ&mode=related&search=

Weah: Þetta er alvöru sprettur vítateiga á milli. Weah var snillingur í fótbolta en ég veit ekki með pólítíkina.

http://uk.youtube.com/watch?v=_wMN5qIoe6c

Ronaldo: Frægt mark frá barca tíð Ronaldo. Það er ekki tæknin sem gerir þetta mark svona flott heldur krafturinn og hraðinn. Bjarni Fel hefði sennilega líkt honum við eimreið.

http://uk.youtube.com/watch?v=2PCwNGT0GzI&mode=related&search=

M. Laudrup: Þetta mark frá Mexíkó 1986 er ekki síðra en mark Maradona gegn Belgum. Merkilegt að fylgjast með hvað Laudrup og Zidane hafa svipaðar hreyfingar. Þetta danska lið komst á topp 20 yfir bestu lið allra tíma þó þeir hafi dottið út fyrir Spánverjum 1-5 í sextán liða úslitum.

http://uk.youtube.com/watch?v=vn0PS85pvqw

Megas

Ég sá Megas á rölti við Suðurgötu þegar ég var að keyra í vinnuna í morgun. Flottur kallinn, klæddur eins og bókmenntafræðinemi í karrýgulum flauelsjakka og með axlartösku hangandi niður eftir síðunni. Það sem vakti athygli mína var að hann talaði í GSM síma. Nú hef ég aldrei talað við Megas í síma en er það ekki dálítið svipað og að vera með Gísla á Uppsölum á línunni.

Bestu mörkin

Hið virta knattspyrnutímairt World Soccer valdi á dögunum bestu mörk knattspyrnusögunnar. Nú er ljóst að það hafa verið skoruð allmörg mörk á þessum 130-140 árum sem menn haa sparkað bolta í net og mörg þeirra hafa verið afspyrnufalleg. Að ætla að draga 20 út er því óvinnandi vegur enda kemur það bersýnilega fram á listanum. Ég get fullyrt að ég hef séð mun fallegri mörk en þau sem birtast hér að neðan en sennilega ná þessi mörk inn á listann vegna mikilvægis þeirra auk glæsileika. Mörk úr heimsmeistaramótum og úrslitaleikjum skipa því veglegan sess.

20. Helmut Rahn: Þetta er miðlungs mark en rak hins vegar síðasta naglann í kistu hins frábæra liðs Ungverja á HM 1954. Það besta við þetta myndbrot er lýsing þularins sem minnir á Hitler úr pontu. Það er líka ástæða til að vekja á því athygli að í lokin tekur Fritz Walter við HM styttunni en minnir frekar á búralegan efnafræðinema sem hefur fengið verðlaun við útskrift heldur en heimsmeistara í fótbolta.

http://www.youtube.com/watch?v=N0avCtHStIk

19. Muller: Náði þessu marki ekki einu og sér, en það kemur nokkuð snemma í myndbandinu á móti Englendingum sem spila í rauðum treyjum. Þokkalegt mark en tónlistin er afbragð, einkar lýsandi fyrir HM í Mexíkó 1970.

 http://www.youtube.com/watch?v=ZbUeB20ty_c

18. Best: Bretar þreytast ekki á að tala um Best og reyna að bera hann saman við Pele og Maradona. Ég efast ekki um að hann var afburðaleikmaður en hann var enginn Maradona. Þetta mark er nokkuð gott en þó má ekki gleyma því að það er skorað gegn Sheffield Wednesday.

http://www.youtube.com/watch?v=x2_WJkegEc4

17.  Baggio: Kristín Finnsdóttir, kennari og tveggja sona móðir, kallaði þennan leikmann alltaf pissudúkkuna. Kannski var það skottið, kannski var það kvenleg mýktin en þetta mark er allavega í háum klassa.

 http://www.youtube.com/watch?v=oSjoK-4G6p4

16. Owen: Englendingar geta auðvitað ekki sleppt þessu marki en þetta er vissulega frábær sprettur hjá stráknum.

 http://www.youtube.com/watch?v=KCGkiwQqp3o

15. Cambiasso: Þetta er frábært mark, það er engin spurning. Serbar höfðu fengið á sig 1 mark í undankeppninni og eitt á mót Hollendingum. Ég þreytist ekki á að lýsa aðdáun minni á þessu argentíska liði.

 http://www.youtube.com/watch?v=6R_iYLca2gc

14. Bergkamp: Frábært mark hjá Hollendingnum. Móttakan, gabbhreyfingin og afgreiðslan eins og best verður á kosið. Ayala greyið úti á túni eins og á móti Owen.

 http://www.youtube.com/watch?v=Mo7IgS_x_fc

13. Rivaldo: Ég held að Flóki Halldórsson hafi verið á vellinum þegar þetta mark var skorað. Því verður ekki neitað að þetta er afspyrnuglæsilegt auk þess sem þetta kom barca í Meistaradeildina.

 http://www.youtube.com/watch?v=is5A5miv6XM

12. Giggs: Blautur draumur hvers United manns. Ryan Giggs afhjúpar loðna bringuna eftir 60 metra hlaup gegn Arsenal.

 http://www.youtube.com/watch?v=EgHi3D7OjNs

11. Villa: Þetta mark er í mesta lagi þokkalegt og á tæplega heima á þessum lista.

http://www.youtube.com/watch?v=wHMSqea3OX8

10. Messi: Maradona markið. Ég er ekki frá því að þetta sé betra mark en Maradona skoraði ef maður veit ekkert um mótið eða mótherjana. Klassamark, því verður ekki neitað, en dugði skammt.

http://www.youtube.com/watch?v=hokq-7olthE

9. Maradona: Flott mark hjá Maradona en þetta er aðeins of auðveld. Var Maradona svona rosalega góður eða voru Belgarnir að hugsa um bjór og krækling með frönskum?

  http://www.youtube.com/watch?v=PFKYOMdesdc

8. Puskas: Ómetanlegt mark. Englendingar höfðu aldrei séð aðra eins takta sem sést best á ömurlegri skriðtæklingu varnarmannsins, hann dettur bókstaflega á rassinn. Einfalt og flott.

 http://www.youtube.com/watch?v=ZCaEDoB2oxc

7. Carlos Alberto: Menn voru greinlega orðnir þreyttir í sólinni í Mexíkóborg enda er þetta mark í slow motion.  Ekki í uppáhaldi á þessum bæ.

http://www.youtube.com/watch?v=0HrjevD2vhk

6. Archie Gemmill: Þetta mark hefði aldrei komist inn á lista hjá blaði sem hefði ekki breskar rætur. Markið er reyndar mjög flott og verður enn þá flottara þegar manni verður hugsað til Trainspotting.

 http://www.youtube.com/watch?v=d1axsnMRbbo

5. Pele: Sautján ára óspjallaður Pele sýndi frábæra takta gegn Svíum í úrslitum 1958. Þetta hefur kannski verið gert betur en í sögulegu samhengi er þetta flott mark.

 http://www.youtube.com/watch?v=k1tKmCgF0sE 

4. Owairan: Óværan frá Saudi Arabíu lék Belga grátt 1994. Sennilega kann enginn að rekja bolta í Belgíu enda kemur það þeim alltaf í opna skjöldu þegar e-r tekur sprett gegn þeim. En spretturinn er góður þó hann verði hálf klaufalegur í blálokin.

http://www.youtube.com/watch?v=y8w89sl7Grc

3. Zidane: Þetta er frábært mark sem tryggði Real titilinn í CL. Ekki fyrsta markið með viðstöðulausu skoti en þetta er svona staður og stund mark. En því verður ekki neitað að afgreiðslan er snilld, sérstaklega þegar litið er til þess hvað boltinn kemur úr mikilli hæð. Ég held að þulurinn sé sammála.

http://www.youtube.com/watch?v=bcsE_M19gVo

2. Basten: Þetta er í mínum huga besta mark allra tíma. Sovétmenn eru að komast inn í leikinn af krafti og þá ná Hollendingar hraðri sókn og sjálfur Arnold Muhren sneiðir boltann inn í teig þar sem Basten smellir honum með slíkri nákvæmni að annað eins hefur ekki sést. Man ennþá að Bjarni Fel datt út þegar markið var skorað, slíkur var kyngimagnaður kraftur þess.

http://www.youtube.com/watch?v=bBNDlQvPYxw

1. Maradona: Viðbrögð þularins segja allt sem segja þarf um þetta mark. Augljóslega snilld sem mun toppa þennan lista á sama hátt og Citizen Kane í bíó og Sgt. Peppers í tónlist. Fyrir þá sem ekki skilja spænsku þá þýðir llorar að gráta.

 http://www.youtube.com/watch?v=D-9I5DD6p4k

 

SNL í boði KGB

Ég hef ekki verið mjög spenntur fyrir Saturday Night Live hingað til en þetta atriði er í hæsta gæðaflokki.

http://www.youtube.com/watch?v=tt8bJdmUlSo

Trend sem aldrei varð

HM í Argentínu var sennilega fyrsta mótið þar sem fótboltatreyjur liðanna voru merktar með framleiðanda. Flestar þjóðirnar spiluðu í Adidas, Skotar voru einu fulltrúarnir í Umbro þar sem Englendingar voru fjarri góðu gamni en sennilega voru Mexikóar svalastir enda spiluðu þeir í Levi´s treyjum. Ég veit reyndar ekki til þess að Levi´s hafi framleitt fleiri fótboltatreyjur. Synd að Wrangler og Lee Cooper skyldu ekki feta sömu slóð, hvað þá Duffy.