Pottlok

Af hverju er lok á bikurum? Er verið að halda e-u heitu inni í þeim? Mér dettur í hug tveir merkilegir titlar, annars vegar enski FA bikarinn og hins vegar gamli íslenski mjólkurbikarinn. Mér finnst alltaf eins og menn verði að halda aftur af sér þegar þeir lyfta þessum bikurum, annars fari illa og lokið lendi á hausnum á fyrirliðanum eða rúlli í burtu. Það er e-ð annað en besti bikar í heimi, sjálfur Evrópubikarinn sem hægt er að rífa upp og slengja fram og aftur í sigurvímunni.

Í röð

Í Vesturbænum er starfrækt velþekkt ísbúð. Tengdafjölskyldan  hefur mikið dálæti á ísnum sem þar fæst og er jafnan þekktur sem sá gamli og jafnvel sá kaldi. Eins furðulegt og það er. Ég er ekki jafnheillaður af þessum ís en get svo sem skóflað honum í mig þegar þannig liggur á mér. Stærsti gallinn við ísbúðina er hins vegar sá að þarna ræður ríkjum undarlegur maður, sem hélt því m.a. fram þegar hann rak Félagsheimilið á Seltjarnarnesi að Sykurmolarnir vildu helst ekki spila annars staðar. Í gærkvöldi fór ég í búðina til að kaupa ís með eldri dóttur minni og mætti þar röð út úr dyrum sem lengdist smátt og smátt. Hins vegar voru fáir inni í búðinni sjálfri enda hefur þessi venja skapast þrátt fyrir að hitastig geri ekki beinlínis ráð fyrir því á Íslandi. Líklega finnst fólki þetta skárra en að troðast inni í búðinni með pókersvip og vera stöðugt á varðbergi hvort e-r ætli að svindla sér fram fyrir mann. En það er lausn á þessu sem heitir númerakerfi og hefur verið notað við góðan orðstír í mörg ár víðs vegar í heiminum. Vissulega byltingarkennd  hugmynd en ég ákvað samt að bera hana upp við þau hjónin þegar ég var að borga. Og ekki stóð á svari hjá kallinum. það er alltof mikil hætta á misnotkun. Nú hef ég heyrt um ýmis konar misnotkun en misnotkun á númerakerfi? Ég er hræddur um að meistarinn sé að spara.

Betri borg

Reykjavík er falleg borg í mínum huga. Á fallegum vor-og sumarkvöldum fær maður ekki betri upplifun. Blóðrautt sólarlag, Akrafjall og Skarðsheiðin og Snæfellsjökull við sjóndeildarhringinn. Á þannig dögum er hvergi betra að vera en á ferðinni í bænum , það kemur e-r Tómas Guðmundsson upp í manni og maður verður ljóðrænn og væminn. Ég skil því ekki þessa eilífu umræðu um hvað Reykjavík sé ljót og leiðinleg borg. Áuðvitað eru margir annmarkar, skallabletturinn í Vatnsmýrinni er skammarlegur og mörg úthverfin eru kannsku ekki mikið fyrir augað en það eru þau ekki heldur í París. Rútuferðin frá flugvellinum er orðin hálftíma löng þegar maður sér loksins hins rómuðu borg ástarinnar. Hitt er bara jafn ljótt og það verður í hinum vestræna heimi. Það er þvi spurning hvað maður vill að verði gert eftir kosningarnar í vor.

Í fyrsta lagi vil ég að leikskólinn verði gjaldfrjáls og öllum opinn frá amk 18 mánaða. Ég nenni ekki að hlusta á vælið í þeim sem spyrja hvort það sé sanngjarnt gagnvart barnlausum. Mér er alveg sama, það er fullt af fólki sem á ekki bíl en samt er malbikað án þess að það sé rukkað fyrir það sérstaklega.

Í öðru lagi vil ég að menn hætti þessu Sundabrautartali. Jú jú leggið þennan veg e-n daginn en að taka alla umræðu undir jarðgöng, innri leið, ytri leið, íbúalýðræði og blablabla. Ég veit ekki betur en að það hafi gengið nokkuð klakklaust fyrir sig að komast upp á Kjalarnes hingað til. Það er hins vegar ágæt hugmynd að setja e-s konar Golden Gate brú milli Ikea og Áburðarverksmiðjunnar en er það ekki líka svolítið aumkunavert. Eins og að byggja skýjakljúf við Smáralind.

Í þriðja lagi flugvöllinn burt. Reyndar hef ég notið góðs af staðsetningu hans í vetur og gekk m.a. þangað í annað skiptið eins og ég væri að fara að taka strætó. Ég verð því varla sakaður um að nota hann ekki. En þetta er bara svo fáránlegt að vera með flugvöll á þessum stað. En ekki flytja hann út á Löngusker. Ég var á Ægissíðunni um daginn og þá rann upp fyrir mér að það er ekkert varið í þessa hugmynd. Ég vil frekar hafa útsýnið eins og það er.  Mér finnst miklu betri hugmynd að setja hinn niður á leiðinni til Selfoss.

Hins vegar sýnist mér að það muni ekki breyta neinu hverjir munu stjórna eftir kosningarnar. Það lofa allir því sama og það er enginn munur á framboðunum svo marktækt sé. En ætli ég kjósi ekki það sama af gömlum vana.

HM, H-riðill

Þetta er sá riðill sem mér finnst persónulega mest spennandi enda er Spánn mitt lið, Ekki skemmir fyrir að ég fer á tvo leiki í honum, Spánn-Úkraína og Spánn-Túnis. Fyrir aðra er þetta kannski ekki mjög spennandi.

Spánn: Það er ekki auðvelt að halda með Spánverjum enda virðist þeir alltaf klúðra öllu sem þeir geta á stórmótum. Eftirminnilegast er auðvitað að detta út fyrir S-Kóreu 2002 þegar þeir fengu gullið tækifæri að gera sögulega hluti. Liðið í ár er gott, Casillas er einn besti markmaður í heimi, vörnin er öll að koma til með Puyol, Ramos, Juanito og Marchena og þeir eru með frábæra miðjumenn og kantmenn. Sóknin er spurning, Morientes og Raúl eru í tómu tjóni og Torres er alltaf spurningamerki. Raúl spilar hins vegar best með landsliðinu og þeir fara langt ef Reyes, Joaquin, Alonso, Xavi og jafnvel Fabregas verða heilir. Það gerir enginn ráð fyrir neinu í þetta sinn og ef þeir ná að stilla strengina og komast í rétta stemmningu gætu þeir farið langt. Hins vegar er þjálfarinn þeirra Luis Aragones, sá sem kallaði Henry svartan skít, ekki nógu góður enda hefur hann náð bestum árangri með liðum sem teljast litli maðurinn. Með spænska liðið verður hann  hins vegar að geta stjórnað leikjum og það hefur ekki gengið nógu vel. Þeir fara upp úr riðlinum og annað hvort alla leið í úrslitin eða í átta liða úrslit. En líklega er það wishful thinking því þeir fara örugglega á taugum við fyrsta tækifæri og verða landi og þjóð til skammar eina ferðina enn.

Úkraína: Mig minnir að þeir hafi verið fyrstir til að tryggja sig áfram og gamla kempan Oleg Blokhin er greinilega að gera góða hluti. Það eru samt ekki margir þekktir kappar í liðinu en það vildu öll landsliðin á HM hafa Shevchenko í liðinu. Þeir hafa ekki mörg tækifæri til þess að komast á svona mót og Sheva verður 34 ára á næsta HM þannig að hann mun væntanlega sýna sínar bestu hliðar. Ég á von á að þeir fari upp úr þessum riðli en framhaldið er stór spurning. Gæti orðið spútniklið keppninnar.

Túnis: Þetta er ein sterkasta knattspyrnuþjóð Afríku og eiga hina og þessa leikmenn víðs vegar í Evrópu. Þjálfari þeirra, Lemmerre, gerði Frakka líka að Evrópumeisturum 2000. Efast samt um að þeir veiti Spánverjum og Úkrainumönnum harða keppni en ef þeir síðarnefndu vinna Spánverja í fyrsta leik fara spanjólar kannski á taugum og það getur Túnis fært sér í nyt. Ég geri samt ekki ráð fyrir því.

Saudi Arabía: Ég geri ekki ráð fyrir að þessir fari langt. Þeir voru án efa með lélegasta liðið á HM 2002 og stundum var vandræðalegt að horfa á þá. Hafa eflaust bætt sig aðeins og unnu meðal annars S-Kóreu heima og úti í undankeppninni en það er ekki hægt að horfa framhjá því að að þeir komust á HM með því að vinna Túrkmenistan, Úsbekistan, Langtbortistan og Fjarskanistan meðal annarra. Ættu ekki að verða mikil hindrun.

Spánn og Úkraína áfram.

HM, G-riðill

Þetta er annar frekar lítið spennandi riðill þar sem mér er nokk sama hvert þeirra fer áfram en það gæti hins vegar orðið tvísýnt hver hreppir annað sætið.

Frakkland: Eins og Portúgal þá hafa tvö síðustu stórmót endað með hörmungum og þá sérstaklega síðasta HM. Það hlakkaði í manni þegar þeir töpuðu fyrir Senegal og leiðin hefur verið skrykkjótt síðan. Ef Zidane hefði ekki komið aftur væru Írar etv með en kallinn er hins vegar engan veginn sami spilari og fyrir 2-3 árum síðan. Það þarf því mikið að gerast til að hann leiði þá langt í þessari keppni. Henry hefur ekki náð að sýna sitt rétta andlit með landsliðinu í nokkur ár og Trezeguet er hálfgerður tréhestur sem aldrei hefur heillað mig. Þá er vörnin líka lúnari en oft áður en það sem er kannski verst fyrir Frakkana er að þeir eru með handónýtan þjálfara sem virðist hafa skemmt móralinn í liðinu. Ég trúi því nú samt ekki að þeir klikki á að komast upp úr riðlinum en þeir fara ekki lengra en í átta liða.

S-Kórea: Komu verulega á óvart á HM 2002 undir handleiðslu Guus Hiddink sem nú þjálfar Ástrali. Reyndar munu nú flestir eftir því að leiðin í undanúrslitin þá var lituð af ótrúlega lélegri dómgæslu en því er ekki hægt að neita að þetta er frambærilegt lið. Ég ætla að spá því að þeir fari upp úr riðlinum en detti út í 16 liða úrslitum.

Sviss: Þetta er skelfilega lítið spennandi landslið og þó að nokkrir ungir og efnilegir séu að koma upp vona ég að þeir detti út. Reyndar mega þeir eiga það að þeir losuðu okkur við Tyrkina og Ísraelsmenn en ég held að þeir geri engar rósir þó þeir séu allt að því á heimavelli.

Togo: ÞAð verður spennandi að sjá þetta lið því það má gera ráð fyrir að þeir séu slakasta Afríkuliðið í ár. Þeir töpuðu meira að segja fyrir Miðbaugs-Gíneu í undankeppninni en komust úr riðli með Senegal þannig að þeir eru ekki alslæmir. Kannski ná þeir upp e-i stemmningu en ég er hræddur um að hlutskipti þeirra verði í mesta lagi eitt stig.

Frakkland og Suður Kórea áfram

HM, F-riðill

Fyrsta sætið ætti að vera nokkuð ljóst hérna en það verður meiri barátta um annað sætið í þessum riðli en nokkrum öðrum.

Brasilía: Sigurstranglegasta liðið og skiljanlega. Toppmenn í öllum stöðum og á bekknum. Dida er reyndar ekki 100% í markinu og Carlos er orðinn þreyttur og Emerson líka. Luizao er mjög sterkur varnarmaður eins og hann sýndi á móti Liverpool og svo eru þeir auðvitað með Ronaldinho og Ronaldo sem eiga eftir að setja nokkur. Hins vegar er ég nokkuð viss um að þeir vinni ekki þessa keppni, þeir eru of sigurstranglegir til þess. Þeir komast auðveldlega upp úr riðlinum en lenda svo á móti e-u öguðu liði í útsláttarkeppninni og þá fer þreytan að segja til sín enda eru þeir með leikmenn sem spila aðalhlutverk í sínum liðum fram á síðasta dag. Ekki lengra en undanúrslit jafnvel fyrr.

Króatía: Þegar Króatarnir náðu í undanúrslit 1998 voru þeir með Boban, Suker, Jarni og fleiri góða úr sínum gullaldarárgangi ´68. Þannig er það ekki lengur. Þeir eru með sterkt lið en það heillar mig ekki. Dado Prso er eins og kall í klámmynd sem kemur til að laga loftnetið, Kovac bræður eru ekki heimsklassaleikmenn og aðra þekkir maður lítið. Hins vegar er liðsheildin eflaust sterk og þeir hafa náð góðum úrslitum gegn Brössum nýlega en ég held að þeir telji sig yfir Japani og Ástrali hafna og flaski á því.

Ástralía: Þessir eiga eftir að koma á óvart og fara í 16 liða en  ekki lengra. Það verður góð stemmning í liðinu og þeir eru með marga frambærilega menn. Það verður Skotabragur á þeim og ég veit að þeir striða Brössunum.

Japan: Þeir hafa bætt sig mikið á síðustu árum og verður flestum erfiðir en munu eiga erfitt með að skora og þ.a.l. efast ég um að þeir vinni leik. Ég held að þeir séu aðeins of kurteisir, vantar eflaust ruddaskapinn sem mun fleyta Áströlum áfram, en tæknina vantar ekki. En það verður stemmning uppi í stúku: "Nippon dududu Nippon dududu".

Brasílía og Ástralía áfram

HM, E-riðill

Þetta er annar dauðariðill og það er eiginlega ómögulegt að spá fyrir um niðurstöðuna.

Ítalíu: Ég hélt með Ítölum á HM 1994 og EM 1996. Það er hálf glatað í dag og ég get ekki sagt að ég sakni þess. En það er e-ð sem segir mér að þeir fari langt í ár, það á ekki nokkur maður von á e-u frá þeim og Lippi er snjall þjálfari. Ef Totti verður heill og getur sýnt sínar bestu hliðar þá gætu Gilardino og Toni blómstrað. Svo þurfa þeir varla að hafa áhyggjur af aftasta hlutanum nema kannski ef Nesta er tæpur. Ef þeir spila eins og harðjaxlarnir frá 1982 þá eiga þeir góða möguleika en ef gelið og greiðslan verður í aðalhlutverki fara þeir ekki upp úr þessum riðli. Spái því að þeir rétt sleppi upp úr riðlinum, hugsi sinn gang og verði öllum erfiðir eftir það. En hversu langt það nær veit enginn.

Tékkland: Það halda furðu margir Íslendingar með Tékkum. Kannski ekki skrýtið, þeir hafa átt marga toppleikmenn hjá sterkum liðum og spila oft mjög skemmtilega. Það er því erfitt að láta sér líka illa við þá. Ég er samt hræddur um að þeir verði ekki jafn góðir og oft áður og gæti trúað því að þeir lendi einfaldlega í vandræðum í þessum riðli. Nedved hefur ekki sama kraftinn og oft áður, Rosicky og Koller hafa átt í smá erfiðleikum og maður heyrir varla minnst á Baros lengur. Vörnin er hins vegar öflug og svo er markmaðurinn í fremstu röð en frammistaða þeirra veltur á því hvernig Ítalirnir koma til leiks. Fari þeir áfram verða átta liða úrslitin endastöð.

USA: Þessa vil ég út sem fyrst en þeir eiga eftir að stríða amk Ítölunum. Ég sá úr leiknum þeirra við Þýskaland 2002 um daginn og þeir spiluðu hraðan og góðan bolta. Þeir eru með marga góða unga leikmenn td Donovan og svo er spurning hvort þessi umtalaði Adu fái tækifæri. Liðsheildin er sterk og ekki vantar sjálfstraustið eftir síðasta mót og ég gæti trúað að þeir farí í 16 liða en ekki lengra.

Ghana: Freddy Adu er víst frá Ghana en þeir get ekki notað hann núna. Hins vegar eiga þeir marga góða leikmenn og gætu orðið Kamerún/Nigería þessa móts. Stærsta nafnið er Essien en aðrir leikmenn hljóta að vera þokkalegir amk varnarmenn því þjálfari hefur víst séð ástæðu til að skilja Samuel Kuffour eftir. En riðillinn er erfiður og ég held að þeir komist ekki áfram.

Ítalía og USA áfram

HM, D-riðill

Kannski er þetta sá riðill sem er minnst spennandi í keppninni amk fyrir mig. Liðin í riðlinum hafa aldrei gert neitt fyrir mig og Portúgal og Mexikó ættu að eiga nokkuð auðvelt verk fyrir höndum.

Portúgal: Það hlýtur að sitja í Portúgölum að hafa tapað fyrir úrslitaleiknum á EM fyrir tveimur árum og að hafa ekki komist upp úr riðlinum á síðasta HM. Það eru kynslóðaskipti hjá þeim og gömlu gullkempurnar allar á leið út en framtíðin er nokkuð björt. Simao, Ronaldo, Deco og co. er mjög frambærilegir en ég hef ekki mikla trú á þessu liði í ár. Ekki er það til að bæta ástandið að Big Phil er líklega næsti þjálfari Englendinga og það getur haft áhrif upp eða niður. En kallinn er hörku manager og getur komið þeim í átta liða en varla lengra. Ég verð hins vegar að lýsa aðdáun minni á því hvað þeir geta samt alltaf komið fram með góða fótboltamenn, ekki stærri þjóð.

Angóla: Þessir komu sjálfum sér og öðrum verulega á óvart og komust í fyrsta skipti á HM í ár. Mjög merkilegt einkum í ljósi þess að þeir kepptu fyrst í undankeppninni 1984. Það er e-r Trinidad og Tobago stemmning í kringum þetta lið, aðalgaurinn og fyrirliðinn Akwa virðist vera e-s konar D. York , spilaði með Benfica en er nú að safna til mögru áranna í Quatar. Ég væri alveg til í að sjá þá komast áfram en ég sé þá ekki slá Mexikó út og Portúgalir fara varla að klúðra enn einu mótinu. En ef þeir skora þá verða þeir öugglega með sniðug fagnaðarlæti og maður fær tár á augun vegna þess að HM sameinar heiminn.

Mexikó: Þetta er líklega undarlegasta knattspyrnuþjóð í heimi. Þessi 100 milljóna þjóð hefur mikinn áhuga á fótbolta en landsliðið hefur aldrei náð að verða alvöru afl í boltanum og fyrir utan Hugo Sanchez er frægasti leikmaður þeirra markvörður sem sem gat líka brugðið sér í sóknina. Þá hafa mjög fáir þeirra náð að blómstra í Evrópu. Síðustu ár hafa þeir hins vegar verið að koma til og eru með hörkulið, skora kannski ekki mikið en fá heldur ekki mörg mörk á sig. Þeir voru eina liðið sem vann Brassa á upphitunarmótinu síðasta sumar og gætu komið á óvart í ár.

Íran: Mér skilst að snillingurinn Ali Daei sé enn að og þá hljóta möguleikar liðsins að vera miklir. Þeir eru víst með ágætt lið, stór hluti þeirra sem spila í Evrópu eru í Þýskalandi og svo eru þeir víst með marga unga og efnilega leikmenn. Ef þeim gengur vel eiga Bush og forsetinn þeirra eftir að ná sáttum en ef illa fer má búast við að fyrsta sprengjan lendi í Leipzig. Því miður fyrir heimsbyggðina ná þeir bara þriðja sæti.

Portúgal og Mexikó komast áfram

Naflastrengur

Ef helvíti er til þá held ég að lyktin þar sé af rotnuðum naflastrengsstubbum. Þvílíkur viðbjóður!! Hvernig er hægt að láta svona lítinn yndislegan demant eins og dóttir mín er, lykta eins og holræsi. Vonandi verður hún laus við þetta í nótt eða á morgun og fer aftur að ilma eins nýútsprungin rós. En eins og staðan er næ eg þessu ekki  af, hvorki með því að snúa honum né með því að ýta hraustlega við þessu með eyrnapinna.

En feðraorlofið er í góðum gír, sú stutta er vær og góð og gefur pabba sínum tækifæri til að sinna mikilvægum málum eins og spádómum um HM. Reyndar finnst Sillu fyndið hvað ég skrifa mikið á þessa síðu meðan ég ætti að vera að sinna búi og börnum. Sem ég geri reyndar ágætlega.

HM, C-riðill

Þetta er dauðariðill enda held ég að öll liðin séu nokkuð frambærileg.

Argentína: Ég hef aldrei verið mikill aðdáandi Argentínumanna og þoldi t.d. aldrei Maradona. Ég hef hins vegar lært að meta þá meira á síðustu árum og vona að þeim gangi betur nú en áður. Þessa hugarfarsbreytingu má m.a. rekja til þess að ég fór á leik með þeim á Monumental vellinum í Buenos Aires. Á pappírnum er þetta eitt af betri liðunum, en þegar betur er að gáð reynast veikleikar. Sóknin er t.d. spurningamerki, Crespo hefur oft verið betri og þeir eiga eiginlega engann annan center á heimsmælikvarða. Miðjan er mjög góð það er spurning hvernig þeir ætla að raða henni upp. Riquelme, Cambiasso, Aimar, Duscher og fleiri eru allir úr sigurliði á HM u-19 minnir mig 1997 og svo eru þeir með hörku vörn og markmann. Sjálfstraustið mætti hins vegar vera meira og það virðist fleira hafa tapast en pesóar við kreppuna 2001. Hins vegar held ég að ef Riquelme sýnir sínar bestu hliðar og sóknarmennirnir finni sig, þá fer þetta lið langt og jafnvel alla leið í úrslitin. En þeir eru brothættir.

Holland: Ég hélt alltaf mikið með Hollendingum en hætti því ca. á EM 1996. Nú er ég spenntur fyrir þeim aftur og það er að mestu snillingnum Van Basten að þakka. Hann er að koma með mjög óreynt lið en virðast vera að skapa góða liðsheild úr hæfileikaríkum spilurum. Hann hefur reyndar sagt að liðið muni ekki spila mjög áferðarfallegan bolta til að byrja með en það komi þegar búið verði að styrkja undirstöðurnar. Ég hef trú á því að þeir eigi eftir að koma á óvart og fara allavega í undanúrslit. En það er kannski aðeins of mikil bjartsýni.

Fílabeinsströndin: Ég held að þetta verði sú Afríkuþjóð sem muni koma mest á óvart. Það er hins vegar slæmt fyrir þá að lenda í svona erfiðum riðli og ég get ekki spáð þeim upp úr honum. En þeir eru með nokkra leikmenn sem spila með liðum í fremstu röð og ég held að þeir geti snúið heim með höfuðið hátt.

Serbía: Serbarnir voru efstir í sínum riðli í undankeppninni og sendu því Spánverja í umspilið. Það er auðvitað löngu vitað að frá Balkanskaga koma afburðaboltamenn en ég efast um að þetta lið sé betra liðið sem datt út fyrir Argentínu á HM 1990 eða liðið frá 1998. Þeir eru reyndar með nokkuð öfluga sóknarmenn eins og Milosevic og Kezman og fleiri sem hafa spilað á Spáni og hörku vörn en ég er ekki viss um miðjuspilið hjá þeim. Býst við að þeir berjist um 3. sætið við Drogba og co. en það kæmi mér á óvart ef þeir færu lengra. En þeir fengu reyndar bara á sig eitt mark i 10 leikjum í undankeppninni þannig að það verður enginn hægðarleikur að vinna þá.

 Hollendingar og Argentínumenn fara áfram úr þessum riðli.