HM, H-riðill

Þetta er sá riðill sem mér finnst persónulega mest spennandi enda er Spánn mitt lið, Ekki skemmir fyrir að ég fer á tvo leiki í honum, Spánn-Úkraína og Spánn-Túnis. Fyrir aðra er þetta kannski ekki mjög spennandi.

Spánn: Það er ekki auðvelt að halda með Spánverjum enda virðist þeir alltaf klúðra öllu sem þeir geta á stórmótum. Eftirminnilegast er auðvitað að detta út fyrir S-Kóreu 2002 þegar þeir fengu gullið tækifæri að gera sögulega hluti. Liðið í ár er gott, Casillas er einn besti markmaður í heimi, vörnin er öll að koma til með Puyol, Ramos, Juanito og Marchena og þeir eru með frábæra miðjumenn og kantmenn. Sóknin er spurning, Morientes og Raúl eru í tómu tjóni og Torres er alltaf spurningamerki. Raúl spilar hins vegar best með landsliðinu og þeir fara langt ef Reyes, Joaquin, Alonso, Xavi og jafnvel Fabregas verða heilir. Það gerir enginn ráð fyrir neinu í þetta sinn og ef þeir ná að stilla strengina og komast í rétta stemmningu gætu þeir farið langt. Hins vegar er þjálfarinn þeirra Luis Aragones, sá sem kallaði Henry svartan skít, ekki nógu góður enda hefur hann náð bestum árangri með liðum sem teljast litli maðurinn. Með spænska liðið verður hann  hins vegar að geta stjórnað leikjum og það hefur ekki gengið nógu vel. Þeir fara upp úr riðlinum og annað hvort alla leið í úrslitin eða í átta liða úrslit. En líklega er það wishful thinking því þeir fara örugglega á taugum við fyrsta tækifæri og verða landi og þjóð til skammar eina ferðina enn.

Úkraína: Mig minnir að þeir hafi verið fyrstir til að tryggja sig áfram og gamla kempan Oleg Blokhin er greinilega að gera góða hluti. Það eru samt ekki margir þekktir kappar í liðinu en það vildu öll landsliðin á HM hafa Shevchenko í liðinu. Þeir hafa ekki mörg tækifæri til þess að komast á svona mót og Sheva verður 34 ára á næsta HM þannig að hann mun væntanlega sýna sínar bestu hliðar. Ég á von á að þeir fari upp úr þessum riðli en framhaldið er stór spurning. Gæti orðið spútniklið keppninnar.

Túnis: Þetta er ein sterkasta knattspyrnuþjóð Afríku og eiga hina og þessa leikmenn víðs vegar í Evrópu. Þjálfari þeirra, Lemmerre, gerði Frakka líka að Evrópumeisturum 2000. Efast samt um að þeir veiti Spánverjum og Úkrainumönnum harða keppni en ef þeir síðarnefndu vinna Spánverja í fyrsta leik fara spanjólar kannski á taugum og það getur Túnis fært sér í nyt. Ég geri samt ekki ráð fyrir því.

Saudi Arabía: Ég geri ekki ráð fyrir að þessir fari langt. Þeir voru án efa með lélegasta liðið á HM 2002 og stundum var vandræðalegt að horfa á þá. Hafa eflaust bætt sig aðeins og unnu meðal annars S-Kóreu heima og úti í undankeppninni en það er ekki hægt að horfa framhjá því að að þeir komust á HM með því að vinna Túrkmenistan, Úsbekistan, Langtbortistan og Fjarskanistan meðal annarra. Ættu ekki að verða mikil hindrun.

Spánn og Úkraína áfram.

Athugasemdir

[Laulau (IP-tala skráð) 28.4.2006 kl. 23:28]

Mér finnst þetta riðlatal jaðra við dónaskap! hehehe, hvað eru eiginlega margir riðlar!?

[kjarri (IP-tala skráð) 28.4.2006 kl. 23:31]

Það hlaut að koma að því að ég færi að fíla Spánverjana. Ég hef aldrei almennilega fyrirgefið þeim fyrir 5-1 sigurinn gegn Dönum 86 og svo hafa þeir bara verið heldur sorglegir greyin. Ég spái því að þeir spili besta boltann af öllum í sumar en detti svo út í 16 eða 8 liða úrslitum í vítakeppni gegn Sviss. Úkraínumenn hlakka ég líka til að sjá enda frábærir í undankeppninni. Ef þeir spila skemmtilega mun ég styðja þá af heilum hug. En hvernig er það, á ekki að gefa Garcia séns eftir þessa þrennu um daginn?

[EG, 28.4.2006 kl. 23:41]

Garcia er einn af þeim leikmönnum sem munu aldrei fá séns hjá mér, því miður. Það er e-ð við mislukkaðar hælspyrnur og örmjóa barta sem gerir hann fráhrindandi. Í þann hóp fellur leikmaður eins og Pippo Inzaghi. Hins vegar kom Maradona úr útlegð fyrir nokkru enda snilli hans óumdeild. Ég var hins vegar Zico maður 82 og Platini maður á HM 86 og gat því ekki hugsað mér að dá Maradona. Vonandi verður mér fyrirgefið með tíð og tíma.

[Kjarri (IP-tala skráð) 28.4.2006 kl. 23:51]

Já ég skil reyndar mætavel hvað þú átt við með hælspyrnurnar og bartana og sjálfur var ég afar lengi að sætta mig við að þessi maður væri í Liverpool liðinu. En þegar hann tók svo upp á því að skora gullfalleg mörk í gríð og erg og þrennu í fyrsta landsleiknum sem hann byrjaði inn á í þá er voðalega erfitt að afskrifa manninn algerlega. Hann mætti vera skynsamari og ekki reyna alltaf að gera allt töff og hann mætti líka nýta þó ekkik væri nema eitt og eitt dauðafæri og fara í klippingu. En mörkin hans eru bara orðin það stórfengleg og mikilvæg að ég væri bjáni ef ég segðist ekki þykja dálítið vænt um hann.