HM, E-riðill

Þetta er annar dauðariðill og það er eiginlega ómögulegt að spá fyrir um niðurstöðuna.

Ítalíu: Ég hélt með Ítölum á HM 1994 og EM 1996. Það er hálf glatað í dag og ég get ekki sagt að ég sakni þess. En það er e-ð sem segir mér að þeir fari langt í ár, það á ekki nokkur maður von á e-u frá þeim og Lippi er snjall þjálfari. Ef Totti verður heill og getur sýnt sínar bestu hliðar þá gætu Gilardino og Toni blómstrað. Svo þurfa þeir varla að hafa áhyggjur af aftasta hlutanum nema kannski ef Nesta er tæpur. Ef þeir spila eins og harðjaxlarnir frá 1982 þá eiga þeir góða möguleika en ef gelið og greiðslan verður í aðalhlutverki fara þeir ekki upp úr þessum riðli. Spái því að þeir rétt sleppi upp úr riðlinum, hugsi sinn gang og verði öllum erfiðir eftir það. En hversu langt það nær veit enginn.

Tékkland: Það halda furðu margir Íslendingar með Tékkum. Kannski ekki skrýtið, þeir hafa átt marga toppleikmenn hjá sterkum liðum og spila oft mjög skemmtilega. Það er því erfitt að láta sér líka illa við þá. Ég er samt hræddur um að þeir verði ekki jafn góðir og oft áður og gæti trúað því að þeir lendi einfaldlega í vandræðum í þessum riðli. Nedved hefur ekki sama kraftinn og oft áður, Rosicky og Koller hafa átt í smá erfiðleikum og maður heyrir varla minnst á Baros lengur. Vörnin er hins vegar öflug og svo er markmaðurinn í fremstu röð en frammistaða þeirra veltur á því hvernig Ítalirnir koma til leiks. Fari þeir áfram verða átta liða úrslitin endastöð.

USA: Þessa vil ég út sem fyrst en þeir eiga eftir að stríða amk Ítölunum. Ég sá úr leiknum þeirra við Þýskaland 2002 um daginn og þeir spiluðu hraðan og góðan bolta. Þeir eru með marga góða unga leikmenn td Donovan og svo er spurning hvort þessi umtalaði Adu fái tækifæri. Liðsheildin er sterk og ekki vantar sjálfstraustið eftir síðasta mót og ég gæti trúað að þeir farí í 16 liða en ekki lengra.

Ghana: Freddy Adu er víst frá Ghana en þeir get ekki notað hann núna. Hins vegar eiga þeir marga góða leikmenn og gætu orðið Kamerún/Nigería þessa móts. Stærsta nafnið er Essien en aðrir leikmenn hljóta að vera þokkalegir amk varnarmenn því þjálfari hefur víst séð ástæðu til að skilja Samuel Kuffour eftir. En riðillinn er erfiður og ég held að þeir komist ekki áfram.

Ítalía og USA áfram

Athugasemdir

[Kjarri (IP-tala skráð) 28.4.2006 kl. 22:39]

Já - athyglisverð spá. Eftir að hafa séð gúmmítékkana á síðasta EM get ég bara ekki annað en haldið og vonað að þeir klári djobbið sem þeir áttu að gera þá með sitt yfirburðaskemmtilega lið. Þeir komast í undanúrslit. Ég ætla hinsvegar að spá því að þeir sem búast ekki við neinu af pizzastrákunum hafi rétt fyrir sér og Ítalir fari heim með taglið á milli lappanna eftir riðlakeppnina. Ég var hrifinn af USA á síðasta HM og vona bara að þeir hafi ekki versnað mikið síðan. Tékkland og USA áfram.