Cage

Real Madrid datt út úr Meistaradeildinni í vikunni. Ég hef svo em ekki mörg orð um það að segja, Roma er með gott lið og mínir menn átt einfaldlega ekki skilið að fá meira úr leiknum. Þeir voru bitlausir þegar á reyndi og ég pirra mig enn á því að Riquelme var ekki keyptur í sumar. Liðið treystir hvort eð er bara á örfáa einstaklinga og þá væri ágætt að einn þeirra væri miðjumaður á heimsmælikvarða. Þó að ljóst sé að ekki sé með neinu móti hægt að tala um að Real sé eitt af bestu liðum Evrópu þá er varla um krísu að ræða heldur. Liðið er enn með þokkalega forystu á Spáni en verður augljóslega að halda vel á spilunum til að halda þeirri henni.  Missi þeir af titlinum fara málin hins vegar að vandast. Maður spyr sig samt hvort sé betra að eiga möguleika á þremur titlum eða mjög góðan möguleika á einum.

Það er hins vegar alltaf e-ð dásamlega vandræðalegt í kringum liðið. Þar ráða jafnan ríkjum heimskir menn sem taka oftar en ekki heimskulegar ákvarðanir. Það nýjasta gerðist einmitt síðasta miðvikudag þegar Real datt út. Fax hafði borist á skrifstofur félagsins þar sem boðuð var koma Nicolas Cage. Allt ætlaði um koll að keyra, dregin var fram treyja með nafni Cage á, honum var boðið að sitja í heiðursstúkunni með forseta félagsins og eftir leikinn var farið með leikarann niður í búningsklefana þar sem hann hitti leikmennina. Eins og sjá má á meðfylgjandi myndi virðist Ramon Calderon vera í skýjunum yfir að hitta stórleikarann og varla að sjá félagið hans væri í vandræðum í Meistaradeildinni. Hann hreinlega ljómar af hamingju. Gallinn er bara sá, eins og glöggir og óglöggir lesendur geta séð, að þetta var alls ekki Nicolas Cage heldur e-r eftirherma frá Ítalíu. Maður getur rétt ímyndað sér svipinn á leikmönnunum þegar þeir voru nýdottnir úr Meistaradeildinni. Eflaust hafa e-r setið grenjandi og öskrandi þegar inn til þeirra er leiddur maður sem er kynntur sem Nicolas Cage en gæti allt eins verið bróðirinn í Everybody loves Raymond eða e-r melludólgur frá Napólí. Þó að þetta hefði verið Cage þá er því vandsvarað hvaða erindi hann átti niður í klefa.

Ég hef bara eitt að segja við þessa vitleysinga fyrir sunnan: Hættið að svala heimskulegri hégómagirnd sem er að gera Real Madrid að athlægi um heim allan.  Di Stefano, Puskas, Gento, Juanito, Camacho, Butrageno, Hierro, Zidane og co. eiga betra skilið.

Athugasemdir

[Kjartan (IP-tala skráð) 8.3.2008 kl. 13:28]

Zidane á ekkert betra skilið en lélega Nicholas Cage eftirhermu. í raun á hann mun verra skilið; slöpp Rick Moranis eftirherma væri meira við hans hæfi.

[EG, 8.3.2008 kl. 14:00]

Hættu þessu Zidane nöldri annars afhjúparðu þig sem enn einn Liverpool plebbann, sem heldur að knattspyrnuheimurinn snúist í kringum Steven Gerrard og Jamie Carragher.

Aparassinn mun fara í sögubækurnar sem einn af tíu bestu leikmönnum allra tíma og það þrátt fyrir að ljúka ferlinum með því að skalla leikmann í úrslitaleik HM. Það er mikið afrek. 

[Kjartan (IP-tala skráð) 8.3.2008 kl. 17:19]

Merkilegt hvernig þú færð það út að einhver sem er illa við ofbeldishrottann Zidane sé sjálfkrafa plebbi sem heldur að knattspyrnuheimurinn byrji og endi í norður-Englandi. Ég þoli ekki Zidane, en það hefur ekkert að gera með aðdáun mína á Liverpool og allt með það að gera að Zidane var hreinlega óþolandi hrokagikkur og leiðinda lúsablesi. Mér virðist sem þú eigir í einhvers konar köldu stríði við þá sem kunna að meta enska boltann. Kalda stríðinu er lokið, Eiríkur. Eða eins og Yoko Ono kyrjaði eftirminnilega: War is Over (If You Want It). Yoko hitti þarna, eins og ævinlega, naglann á blómkálshöfuðið.

[EG, 8.3.2008 kl. 18:20]

Ég er ekki frá því að það glitti í kalt stríð milli Kjartans Guðmundssonar og franskra fótboltamanna. Zidane hefur vissulega misst stjórn á skapi sínu og það oftar en einu sinni. Mér hefur hins vegar alltaf fundist eðlilegra að tengja það við e-s konar minnimáttarkennd afkomanda alsírskra innflytjenda í fátækrahverfi Marseilles auk e-s konar meðfæddrar brenglunar heldur en hroka.

Ég hef reyndar heyrt fáa tala um hann sem óforbetranlegan hrokagikk heldur þvert á móti er hann almennt álitinn hlédrægur og frekar almennilegur náungi. Ég skil vel að menn kalli Cantona hrokagikk og jafnvel Henry en ég er ekki að kaupa þetta með Zidane. Þú lærir að meta hans framlag til knattspyrnusögunnar þegar þú verður eldri.

Ég er hins vegar ekki frá því að ef sú staða hefði komið upp að Zidane hefði spilað með Liverpool og verið nákvæmlega sami leikmaðurinn með nákvæmlega sama persónuleika hefði þér ekki fundist hann jafn óþolandi hrokagikkur og leiðinda lúsablesi. En það gæti verið vitleysa. 

Mun þessi deila nokkuð hafa áhrif á rétt dætra okkar til að hittast á morgun?

[Kjartan (IP-tala skráð) 8.3.2008 kl. 18:53]

Dætur okkar munu ekki hittast aftur meðan ég er á lífi.

En ég á erfitt með að svara því hvort ég hefði fílað Zidane ef hann hefði spilað með Liverpool, hallast þó að því að svo hefði ekki verið. Liverpool hefur verið blessunarlega laust við leiðindakaraktera miðað við það sem gengur og gerist. Auðvitað hafa þeir verið nokkrir (sénegalski hráklistamaðurinn Diouf kemur upp í hugann), en hafa þá ekki stoppað lengi við. Kannski er ég að gleyma einhverjum, og kannski er ég svona blindur á galla minna manna. Ég er bara mannlegur, þótt flestir virðist líta á mig sem nokkurs konar hálf-guð.

[EG, 8.3.2008 kl. 19:29]

Þú ert hálfpartinn að bera saman Zinedine Zidane og El Hadji Diouf!!?! Ég legg málið í dóm með hefðbundnum fyrirvara.

Ég er hræddur um að hatur þitt byggi á misskilningi eða Le Pen hafi sprautað ensku sinnepi upp þvagrásina á þér meðan hann sýndi þér myndir af Zidane.

Hringdu ef þér snýst hugur varðandi stelpurnar.

[Örn Úlfar Sævarsson (IP-tala skráð) 10.3.2008 kl. 10:41]

Ég er sammála ykkur báðum. Zidane var óþolandi góður.