Treyja vikunnar

Nú eru liðnir meira en tveir mánuðir síðan treyja vikunnar leit dagsins ljós. Treyja vikunnar má því etv kalla rangnefni en ég fer varla að breyta því úr þessu.

Í þetta sinn er komið að ÍK sem ég hef minnst á áður og mun kannski minnast á aftur. Það hefur lengi verið á teikniborðinu að láta sauma ÍK treyju á lítinn hóp gamalla ÍK inga enda eru gömlu treyjurnar illfáanlegar og þeir sem luma á þeim eru flestir löngu komnir í annan þyngdarflokk en þegar þeir voru á hlaupum um grænar grundir.

Það var svo í lok síðasta árs að ég ákvað að gera alvöru úr þessu og hafði samband við Henson sem tók vel í hugmyndina. Reyndar var ég með mun metnaðarfyllri hugmyndir um að Henson setti í framleiðslu retró treyjur fyrir öll liðin í úrvalsdeildinni og jafnvel nokkur til. Helst frá áttunda og níunda áratugnum, Fram með Goða auglýsingunni, Valur með SS, ÍA með Arnarflug eða Marabou, KR með Coke eða Grohe, ÍBV með Lee Cooper, KA með Duffys og UBK með Byko. Jafnvel bæta við retró útgáfum af landsliðspeysum og treyjum erlendra liða sem Íslendingar gerðu garðinn frægann með. Ekki útilokað að nokkrar með reimuðum kraga hefðu fylgt með.

Hugmyndin er kominn frá Toffs og öðrum erlendum fyrirtækjum sem hafa gert það gott í að framleiða þessar nostalgíuvekjandi vörur.

Henson leist vel á hugmyndina en var hræddur við að framkvæma hana. Það væri allt of mikil óvissa en að auki þyrfti samþykki liðanna og alls kyns vesen. 

Ég ákvað því bara að gleyma þessu og einbeitti mér að ÍK. Við töluðum um 15 þannig treyjur en ég ákvað að fá eina til að byrja með og kanna lauslega hversu margir hefðu áhuga.

Ég var að senda Henson pöntun áðan fyrir 95 peysum. Það þykir mér allgott fyrir félag sem lagðist á hliðina fyrir 16 árum.

Maður spyr sig hversu margir myndu kaupa velheppnaða, retró KR treyju eða e-ð annað lið? Kannski heldur maður hugmyndinni opinni.

Ég er hins vegar hrikalega sáttur við ÍK peysuna með gamla Henson bikarnum. Vona að hinir 90 verði jafn sáttir. 

Athugasemdir

[Hannes Heimir Friðbjörnsson, 3.3.2008 kl. 10:13]

Get ég pantað svona treyju!?

[EG, 3.3.2008 kl. 10:23]

Ætli það ekki, UBK maður og Kópavogsbúi, en með því ófrávíkjanlega skilyrði að þú klæðist henni á derbyleikjunum í sumar. Sendu mér línu á [e-mail].

[Hannes Heimir Friðbjörnsson, 3.3.2008 kl. 12:52]

ég get alveg klæðst henni á derbyleikjunum, hún er nú í réttu litunum, hehe. Rautt hefur aldrei átt heima í Kópavogi. Enda er ég með þá tillögu að gera Vatnsenda að sjálfstæðu bæjarfélagi og HK getur þá flutt þangað!

[Jón Agnar Ólason, 3.3.2008 kl. 16:26]

Frábært framtak, sem galvaníserar þig endanlega sem treyjukónginn.

[Unnur (IP-tala skráð) 4.3.2008 kl. 08:51]

Ég tek eftir hve hálsmálið er lítið í samanburði við bolinn!  Er þetta one size fits all og gerir ráð fyrir að Geiri í Goldfinger og bæjarstjóri Kópavogs muni kaupa?  Og hvað stendur RO fyrir?

[EG, 4.3.2008 kl. 09:47]

Ef hálsmálið er svona lítið er harla ósennilegt að Gunnari bæjarstjóra takist að klæðast treyjunni.