Treyja vikunnar 5

Colorado Caribous 1978:

Frá upphafi áttunda áratugarins og fram á byrjun þess níunda var NASL deildin í fullum gangi í Bandaríkjunum. Þetta var sannkölluð gullöld fótboltans vestanhafs, stærstu liðin fengu talsverða aðsókn og í sumum þeirra þáðu nokkrir af bestu knattspyrnumönnum sögunnar sinn ellilífeyri innan um miðlungsgóða leikmenn frá Ameríku. Nægir að nefna Pele, Cruyff, Beckenbauer, Best og Osgood. Þá voru treyjurnar oft á tíðum algert 70s gull

Colorado Caribous var hins vegar ekki eitt af þeim liðum sem náði að laða til sín stærstu stjörnur heimsins. Liðið var í raun bara til í eitt ár og var síðan flutt til Atlanta og kallaðist Chiefs uppfrá því. Arleifð Colorado liðsins er hins vegar mun mikilvægari en svo að hún tengist smáatriðum eins og fótboltagetu eða árangri á vellinum. Það sem gerir Caribous að goðsögn er treyjan sem þeir spiluðu í þetta eina ár, dökkbrún og ljósbrún gersemi MEÐ KÖGRI!! Þarna var markhópurinn greinilega aðdáendaklúbbur Kenny Rogers. Það hefur oft verið sagt að það sé allt til i Ameríku en þessi hönnun gefur því orðatiltæki nýja merkingu. Hvorki fyrr né síðar hef ég séð fótboltapeysu með kögri en ég vil þakka Colorado mönnum fyrir enda væri heimurinn örlitið fátækari án hennar.

Athugasemdir

[Kjartan (IP-tala skráð) 4.10.2007 kl. 21:44]

Davíð Beckham hefur líklega haldið að hann væri að fara að spila í búningum svipuðum þessum í Amríku. Annars hefði hann aldrei farið, hann goldenballs okkar.

[Jón Agnar Ólason, 5.10.2007 kl. 14:50]

Þetta er sú makalausasta treyja sem ég hef séð ... ekki einusinni tígristreyjan hér að framan kemst nálægt þessari! Það mætti segja mér að það hafi verið sjón að sjá leikmenn stökkva upp í skallaboltana með kögrið reist... eða í skyndisókn með kögrið hossandi í takt. Ótrúlegur búningur.