Auðmenn Íslands

Það er ekki laust við að ég sé þreyttur á að heyra sögur af plebbaskap íslenskra auðmanna. Nú síðast óðu e-r FL Group plebbar inn á tónleika Noruh Jones á skítugum skónum, skvaldrandi og pinnahælaglamrandi þegar hún var byrjuð að spila, reyndar með upphitaranum. Nú skiptir kannski ekki öllu hvort þetta var Norah Jones eða e-r annar en það hljóta flestir að vera sammála um að lágstemmd tónlist má síður við svona brölti.

Tapar maður allri tillitsemi, kurteisi eða klassa við það að eignast einn milljarð? Eða er ástæða þess að maður getur yfirhöfuð eignast milljarð sú að mann skorti tillitsemi, kurteisi og klassa til að byrja með, og því sé auðveldara að vaða yfir allt og alla á skítugum skónum.

Annars er athugunarefni af hverju íslenskir auðmenn láta oft á tíðum eins og nýríkir Rússar. Sorrý Sævar en það er e-ð rússneskt við að vera alltof fullur í flugvél flugfélags sem maður á sjálfur og það er líka dálítið rússneskt að leigja Royal Albert Hall undir Stuðmenn. Þá er ekki síður rússneskt að borga tónlistarmönnum nokkur hundruð þúsund fyrir að spila Nínu, aftur og aftur. Og á maður að þora að segja að það sé dálítið rússneskt að efnast verulega á verksmiðju í St. Pétursborg eða kaupa fótboltalið í Englandi. En þetta síðasta þarf ekki að vera vont, bara dálitið rússneskt.

Athugasemdir

[Laulau (IP-tala skráð) 5.9.2007 kl. 19:48]

Jiiiii hvað ég er sammála

[Sævar Már Sævarsson, 7.9.2007 kl. 17:04]

Það er dálítið rússneskt að selja ríkiseignir og gera ekkert til að tryggja dreift eignarhald, heldur þvert á móti, aðstoða einkavini og otuðum totum í að eignast meira en þeir gætu óstuddir.

Chelsea er með öllu óþolandi lið þar sem það er fjármagnað með einkavinavæðingarrússagulli á meðan landsliðið fornfræga lepur dauðann úr skel.

[Kristin (IP-tala skráð) 10.9.2007 kl. 16:06]

Já með nýríku Íslendingunum kemur vel í ljós hvað þeir hafa margt sameiginlegt með nýríku Rússunum. Þetta viðhorf "á það, má það" og að allt sé falt fyrir peninga sýnir skort á klassa og klassískum gildum. Banalýðveldislegt!!!!