Kínahúsið

Í hádeginu í dag urðu merkileg tímamót í lífi mínu þegar ég borðaði í fyrsta skipti á Kínahúsinu við Lækjargötu. Þessi staður hefur verið á sínum stað frá því ég man eftir mér og þrátt fyrir að ég hafi verið í menntaskóla hinum megin við götuna sá ég aldrei neinn fara þarna inn og þekkti engan sem hafði farið þangað inn.

Stemmningin inni er eins og það hafi verið reynt að skapa kínverskt þema í Staðarskála, allskonar kínadót á borðum og hangandi úr lofti en stólarnir voru eins fjarri Kína og mögulegt er, svona krómstangir með bastsæti og bastbaki, líklega keypt í Rúmfatalagernum. Konan sem afgreiddi var í litlum og alltof stuttum kínaslopp en minnti að öðru leyti ekkert á Kínverja. Maturinn var hins vegar nokkuð góður, í forrétt var e-s konar núðlusúpa með kjúklingi en aðalrétturinn var þríréttað á sama diski, nautakjöt, kjúklingur og djúpsteiktar rækjur. Ég get nú ekki sagt að bragðlaukarnir hafi tryllst af spennu og gleði en þetta var vel útilátið og nokkuð bragðgott. Sérstaklega fyrir verðið, skitnar 950 kr. Ég geri því ráð fyrir að fara aftur á Kínahúsið í hádeginu ef ég gleymi því ekki.

Athugasemdir

[Laulau (IP-tala skráð) 28.8.2006 kl. 20:26]

Asía er líka fín!

[Ása (IP-tala skráð) 29.8.2006 kl. 10:08]

Ótrúlegt að þessi staður skuli enn vera til !!! Segi eins og bróðir minn, þessi staður hefur ALLTAF verið þarna, en samt hefur manni ALDREI dottið í hug að borða þarna. Hafði gjörsamlega gleymt tilveru hans. Spurning um að skella sér einhvern tímann í hádeginu.

[Unnur (IP-tala skráð) 29.8.2006 kl. 11:44]

Ég hef nokkrum sinnum borðað á Kínahúsinu og finnst það bara nokkuð gott.
Tek undir með Ásu, væri gaman að fara aftur e-n daginn!