Sama gamla sagan

16.8.2006 | 12:43

c_documents_and_settings_eirikur_fulltingi_my_documents_my_pictures_sland_spann.jpg

Í Mogganum er verið að tala um að Spánverjarnir hafi verið pirraðir, látið sig detta og ekki nennt að taka þátt í leiknum. Hermann Hreiðarsson tekur undir þetta og talar um að það sé auðvelt að pirra þá aðeins og hneykslast á því að þeim hafi fundist leiðinlegt að spila leikinn. Það er kannski rétt að benda á að eini íslenski leikmaðurinn sem spilar á Spáni hafði það mikinn áhuga á leiknum að hann nennti ekki einu sinni að fljúga til Íslands. Er furða að spænsku leikmennirnir hafi átt að erfitt með að ná upp stemmningu, margir búnir að sitja tugi klukkustunda í flugvélum til og frá og innan USA og víðar. Þar af níu tímar á tveimur sólarhringum til og frá Íslandi. Á miðju undirbúningstímabili! Ég held að menn ættu bara að gefa þeim kredit fyrir að mæta með svo gott sem sitt sterkasta lið til þess eins að gera Eggert Magnússyni greiða, þó lítið hafi farið fyrir góðum tilþrifum.

Hins vegar er ég hræddur um að úrslitin séu einfaldlega slæm fyrir Ísland. Ætla menn virkilega enn einu sinni að fara meta styrkleika liðsins vegna hagstæðra úrslita við stórþjóð í vináttuleik? Fyrir tveimur árum hlógum við að Ítölum eftir 2-0 sigur á Laugardalsvelli. Núna eru þeir heimsmeistarar en við erum í 107. sæti á heimslistanum. Ef liðið ætlar að ná árangri verðum það að vinna eða standa í minni spámönnum, ekki segja endalaust "ég er ekkert lélegri en þessi þó hann sé með 100 sinnum hærri laun", "við getum strítt öllum þessum stórþjóðum þegar við leikum svona" eða "munurinn á okkur og þeim er í raun fáránlega lítill þó maður hafi oft séð þá í sjónvarpinu". Gott og vel, flott að setja markið hátt en markmiðið hlýtur samt að vera að sýna að maður sé betri en sá sem er með svipuð laun og þá er hitt bara bónus. Ekki gera jafntefli við Þjóðverja en tapa svo báðum leikjunum á móti slökum Skotum. Þá hefði verið betra að tapa tvisvar á móti Þjóðverjum og vinna Skota. Þrjú stig gegn einu og jafnvel fjögur ef við gætum hangið á jafntefli við lið eins og Skota á útivelli. Þá loksins getum við horft tilbaka á jafntefli eða sigur á stórþjóð með bros á vör. Sjáum hvað setur í Belfast, þá sjáum við hvað býr í liðinu. Og svo bara Áfram Ísland er það ekki.

Að lokum við ég fræða áhugasama að Ringo Starr hélt með Arsenal, Paul McCartney með Everton en George og John höfðu ekki áhuga á fótbolta. Sonur George mun þó vera mikill púlari en ég sel það ekki dýrara....

Flokkur: Bloggar | Breytt s.d. kl. 16:08 | Facebook

Athugasemdir

Hvar fékkstu þessar upplýsingar um knatthneigð Bítla? Ég hef spurt u.þ.b. milljón manns út í þessa hluti síðustu árin og fengið margar útgáfur af svörum, m.a. að Paul hafi haldið með Everton og að enginn af þeim hafi haft minnsta áhuga á fótbolta - en að Hringur hafi haldið með Ass-anal? Endilega gefðu mér númerið hjá heimildamanni þínum svo ég geti leiðrétt þennan misskilning, sent viðkomandi í meðferð (mér heyrist hann þurfa á því að halda, hefur klárlega verið hlanddrukkinn eða dópaður þegar hann lét þetta út úr sér) og, síðast en ekki síst, sparkað í bakið á honum.

Kjarri (IP-tala skráð) 16.8.2006 kl. 15:07