Bitlaust

Annað verður ekki sagt um spænska landsliðið sem spilaði æfingaleik við Rússa í gær. Ég hef áður sett fram efasemdir um Luis Aragones, þjálfara Spánverja sem af e-m undarlegum ástæðum er kallaður vitringurinn frá Hortaleza. Efasemdirnar hafa verið staðfestar upp á síðkastið, í fyrsta lagi með því að skilja Morientes eftir heima og taka varnarmann með í hans stað. Í öðru lagi kom greinilega fram í gær að hann virðist ekki hafa neina hugmynd um hvernig byggja á gott sóknarlið upp. Í stað þess að mæta vel skipulögðum Rússum með blússandi sóknarbolta stillir hann tveimur varnarsinnuðum miðjumönnum upp og niðurstaðan 0-0. Það er því frekar líklegt að Spánverjarnir lendi í miklum erfiðleikum að skora á HM en ég verð bara að vona að flóðgáttirnar opnist þann 14. júní nk. og allt verði á floti til og með 9. júlí. En er það líklegt?

Verð reyndar að minnast á fyndna umfjöllun um Frakkana. Coupet, markvörður Lyon, stakk af úr æfingabúðum liðsins í fússi þegar ljóst var að Domenech,sem þjálfar Frakka, hafði tilkynnt að Barthez verði aðalmarkvörður á HM. Ég skil reyndar að hann sé fúll, Barthez er búinn að vera í banni í sex mánuði fyrir að hrækja á dómara en Coupet var valinn markvörður ársins þar í landi. En þessi þjálfari er kostulegur, hann hefur víst lýst því yfir að hann muni aldrei velja menn sem eru í sporðdrekamerkinu. Hvernig komast svona erkifífl í þessa stöðu?

Athugasemdir

[Sævar Már Sævarsson, 28.5.2006 kl. 15:50]

Ég finn Guus Hiddink lykt af leik Rússa þessa dagana þó hann sé ekki formlega tekinn við liðinu. Auðvitað er það eðlileg krafa Eiks að Spánn vinni Rússa á þessum tímapunkti en við erum vel mannaðir með gott varnarskipulag. Í undankeppni HM fengu Rússar á sig fimm mörk í ellefu leikjum (en reyndar sjö í þeim tólfta). Úrslitin eru því varla stóráfall fyrir ykkur Spanjólana.