Europop

Þegar maður eldist þroskast maður á þann hátt að ljúfsár þjóðlagaballaða frá Bosníu hljómar vel. En því miður virðist maður verða óþroskaðri með aldrinum líka þannig að teknó europopp með falsettu frá Rúmeníu lætur einnig ágætlega í eyrum. Ég get ekki komist undan því að viðurkenna að ég hef alltaf haft gaman af Eurovision, en áhuginn náði líklega hámarki þegar ég var svekktur yfir þvi að Frakkar töpuðu fyrir Carolu 1991 með laginu White and Black. Ég vissi ekki fyrr en löngu seinna að snillingurinn Serge Gainsbourg átti heiðurinn af því lagi. Hins vegar er algerlega óútreiknanlegt að spá fyrir um sigurvegara í þessari keppni. Í fyrra vann europopp og í ár unnu Orkar í latexbúningum með Spinal Tap lag.

Ég legg til að fá við fáum Mána Svavarsson til að semja lag fyrir Eyþór Arnalds og Sollu stirðu í næstu keppni. Máni hefur gert góða europopp hluti með Latabæ og með smá sellóskoti getur þetta ekki klikkað. Solla stirða syngur og Siggi sæti á sundskýlunni fyrir aftan með bongótrommu. Eyþór hefur örugglega ekkert betra að gera meðan hann er ekki með bílprófið. Með þessu sameinum við latex, europopp, smá djók og þjóðlegt selló. The winning formula!

Athugasemdir

[Sævar Már Sævarsson, 21.5.2006 kl. 15:47]

Tornero, torneræ. Ef Silvía var send af guði til að bjarga keppninni þá er þessi Euroteknótrash Freak, Fjölnir Þorgeirsson mínus massinn, frá Rúmeníu í hennar augum lítill rauður púki með horn, hor, hala, vængi og aflitaðar krullur. Kölski og krullupinninn unnu þessa orustu og Lordi vann stríðið. Annars finnst mér að það eigi að breyta nafninu á keppninni úr Eurovision Song Contest í Eurovision Show Contest, lögin skipta nánast engu máli eftir að símakosningin var tekin í gagnið.