Nostalgía nr. 9. Hlutavelta

Timarit.is er mikil snilld. Þarna getur maður flett gömlum Moggum og jafnvel leitað manneskjur uppi sem eiga myrk leyndarmál en viðkomandi taldi tilheyra fortíðinni. Nú eru þessi leyndarmál hins vegar uppi á hvers manns borðum sé áhugi á þefa þau uppi. Þegar ég fletti  sjálfur mér upp kom hins vegar fátt fram enda hef ég aldrei verið mikið í sviðsljósinu, Við venjulega leit kom ég bara á lista yfir fermingarbörn 5. april 1987 (sem minnir mig á að ég verð að skipuleggja veislu með fermingarsystkinum mínum). Þá mundi ég eftir því að hafa komið í blaðinu með systur minni og vinkonu hennar eftir velheppnaða tombólu. Í kringum 1980 var nefnilega ekkert barn með börnum nema það hefði haldið tombólu og gefið ágóðann til góðgerðarsamtaka. Til að gera meira úr afrekinu, sem fólst í að selja gamalt drasl á uppsprengdu verði til saklausra vegfarenda, var farið upp í Mogga á eftir og mynd smellt af sem birtist yfirleitt hjá Sigmund skömmu síðar, með því málfasíska orðalagi að efnt hefði verið til hlutaveltu. Það kom varla út það blað að ekki væri þar að finna mynd af stoltum krökkum sem með dugnaði og elju höfðu náð að nurla saman 150 kr. eða 210 kr. til Rauða Krossins eða Sjálfsbjargar. Þetta voru kannski ekki háar tölur en var væntanlega fljótt að safnast saman þegar allt kom til alls og því leiðinlegt að þetta æði skyldi fjara út. Eða eru krakkar kannski enn að spyrja um dót á tombólu. Ég hef ekki mikið orðið var við það. Kannski er spurt um dót á hlutaveltu?

Athugasemdir

[Kristín (IP-tala skráð) 25.1.2007 kl. 09:18]

Við erum glæsileg systkinin og búin að vera hugsjónamenn frá blautu barnsbeini! Simone sem vinnur með mér spurði hvort þú værir ekki myndarlegur maður í dag þar sem þú varst greinilega mjög fallegt barn. Ég sýndi henni eina sveitta mynd frá HM í sumar........ en sagði henni að þér hefði ekki liðið vel í hitanum!

Við Tommi förum á laugardaginn til Halle að sjá Ísland-Slóvenía!

[Kristín (IP-tala skráð) 25.1.2007 kl. 14:00]

Ef rýnt er í myndina minnir mig að Ása systir standi í dyragættinni í fjólubláa mittisjakkanum.

[Lára (IP-tala skráð) 25.1.2007 kl. 20:58]

Tombólubransinn hefur breyst mikið skal ég segja þér.  Í dag rekst maður á krakka út í búð sem býður manni að kaupa dót á tombólu   Nenna ekkert að hafa fyrir þessu.

[shg (IP-tala skráð) 26.1.2007 kl. 10:40]

Takið eftir söfnunarupphæðinni - Fer ekki milli mála að er fyrir myntbreytingu!

Eiki minn - sorrí árangurinn þarna í denn var kr. 54.-

[Sævar Már Sævarsson, 26.1.2007 kl. 13:55]

Er þetta ekki strákurinn úr The Shining ásamt tvíburasystrunum?

[Jón Agnar Ólason, 6.2.2007 kl. 23:44]

"Eiríkur ... come and play lottery with us... for ever ...  and ever ... and ever ...

Það er allavega óræður flóttasvipur á drengnum, og ekki verður manni rórra við að sjá svipinn í gættinni bakatil - eflaust einhver sem aldrei náði að græða krónu á tombóluhaldi í lifanda lífi ... uss, þetta er spúkí.