Handbolti

Er til of mikils ætlast að óska eftir því að ekki verði tekið á móti landsliðinu í Vetrargarðinum í Smáralind. Ég hef í sjálfu sér ekkert á móti Smáralind sem slíkri. Smárabíó er nokkuð gott og þrátt fyrir að manni geti liðið eins og maður sé á rölti í sáðrás er Smáralind skárri en Kringlan. Það er hins vegar óendanlega plebbalegt að taka á móti silfurliði frá Ólympíuleikum í verslunarmiðstöð í úthverfi Reykjavíkur.

Flottast væri að þeir sýndu medalíurnar á svölum Alþingishússins enda er það víst í lítilli notkun þessa dagana. Austurvöllur fullur af fólki, ruggandi til og frá með arminn utan um næsta mann, kyrjandi að þau geri sitt besta.

Annars fer að verða þreytandi að heyra um að rottuhlaup sé vinsælla en handbolti. Handbolti er nokkuð vinsæll í flestum löndum Evrópu, sérstaklega Þýskalandi, Frakklandi, Spáni, gömlu austantjaldslöndunum, Skandinavíu og á Balkanskaga. Þá er hann spilaður víða í Norður Afríku og Asíu. Þá las ég í ekki ómerkilegra blaði en hinu snarbreska The Guardian að handbolti hefði verið "the most popular spectator sport" í Sidney fyrir átta árum. Man ekki hvort rottuhlaup var í öðru sæti.

Þegar Frakkar urðu heimsmeistarar 1995 var L´Equipe, stærsta íþróttadagblað Frakklands, undirlagt af fréttum af sigrinum. Hins vegar er þetta smáborgasport í fjölmennari ríkjunum þar sem ekki er grundvöllur fyrir frambærilegum fótboltaliðum. Enda er svo sem engin hætta á að handbolti velti fótboltanum stalli. En það breytir þvi ekki að silfur á Ólympíuleikunum er stórkostlegur árangur.

Og svo er okkur hollt að muna að við getum ekki alltaf unnið allt.

Heimspeki þjóðvegarins

"Ef við keyrum á fugl eða geit komumst við örugglega í sjónvarpið."

 

Sólveig Halla Eiríksdóttir, 6 ára

Google

Google er Guð 21. aldarinnar. Maður leitar einhvers og Google kemur með svarið. Það er ekki nóg með að svarið komi heldur getur það tekið á sig mynd.

Ef maður slær t.d. upp orðinu viðbjóður tekur hann á sig eftirfarandi myndir:

 

 

 

 

 

 

 

Slái maður hins vegar upp orðinu horbjóður kemur þessi mynd:

 

 

 

 

Skrýtið hvernig Google hittir stundum naglann á höfuðið.

 

 

Errea

Íslenska landsliðið er komið í nýja treyju. Veit ekki hvort það megi kalla þetta að fara úr öskunni í eldinn eða framför frá "skyrtunni innan undir bolnum" útfærslunni frá því síðast.

Sennilega skiptir það ekki máli því þessi treyja er steindauð. Það kæmi mér ekki á óvart ef KSÍ og ÍTR hefðu tekið höndum saman og verslað í sameiningu. KSÍ fyrir landslið sem spilar á alþjóðavettvangi en ÍTR fyrir starfsmenn í sundlaugum Reykjavíkur.

En Errea er risastórt fyrirtæki á alþjóðavísu sem er með treyjusamning við landslið í nokkrum heimsálfum. M.a. Grænhöfðaeyjar og nokkur lönd í Eyjaálfu s.s. knattspyrnusamband NSW sem ég í einfeldni minni hélt að væri Nýja Sjáland en komst svo að því að um er að ræða New South Wales í Ástralíu. Það er svipað áhrifamikið á alþjóðavísu og Héraðssamband Suður-Múlasýslu.

Málið er einfalt. Íslenska landsliðið á að spila í Henson eða Hummel.

 

Rasismi

 

 

 

 

 

 

Hópur í spænska tennissambandinu var gripinn við þá ósmekklegu iðju að skásetja augun fyrir Ólympíuleikanna í Peking. Sama var uppi á teningnum hjá spænska körfuboltalandsliðinu. Bandarískir og breskir fjölmiðlar hafa krafist þess að hlutaðeigandi biðjist afsökunar og líkt þessu við þegar Luis Aragones kallaði Henry "svartan skít".

Ég er eiginlega hálffeginn því núna að Laddi varð aldrei alþjóðleg grínstjarna. Það hefði orðið rosalegt fjölmiðlafár ef gamlar myndir af Grínverjanum hefðu verið grafnar upp.

Einka

Fyndin þessi hugmynd að það sem er að gerast í stjórn Reykjavíkur myndi aldrei gerast í einkafyrirtæki. Þar væri búið að reka alla fyrir þessa vitleysu. Staðreyndin er hins vegar sú að það hefur viðgengist alls kyns vitleysa í fyrirtækjum landsins undanfarin ár, með fáránlegum starfslokasamningum og alls kyns bruðli. FL Group er bara eitt nýjasta dæmið en þau eru fleiri. Það er einfaldlega þannig að þegar fólk kemst að kjötkötlunum (þvílíkur frasi) á sér stað e-r brenglun.

Fyndnari er samt sú hugmynd að allir eigi að segja af sér í borgarstjórn. Af hverju eiga Dagur og Svandís að segja af sér? Er það vegna þess að þau mynduðu nýjan meirihluta þegar sá fyrsti sprakk og voru svo stungin í bakið af manni með óráði. Óskar Bergsson má líka starfa áfram þó ferill hans sé kannski ekki glæsilegur. Ef hann telur Bitruvirkjun mikilvægari en önnur mál verður bara að hafa það. En það er alltaf hálf hallærislegt fyrir nýja stjórn þegar næsti maður á lista styður ekki meirihlutasamstarfið.

Fyndnast er samt að Vilhjálmur "GGV" Vilhjálmsson sé enn á staðnum. Kann þessi maður ekki að skammast sín? Dubbaði upp sjúkan einstakling sem borgarstjóra svo hann gæti náð fram persónulegri hefnd. Og hefur leitt til athlægis, stöðnunar og fáránlegra fjárútláta á rúmu hálfu ári.

Skari

Í þessum meirihlutaskiptum lítur Óskar Bergsson út eins og feiminn unglingur sem heldur að hann sé að fara að fá að ríða. Rauður á eyrunum, reynir að halda stillingu en missir sig alltaf í vandræðalega brosgeiflu.

Ég man eftir allmörgum svona gæjum á skólaböllum í gamla daga, teymdir um salinn af stórum, ákveðnum konum. Höfðu mætt nokkuð snyrtilegir á ballið en þónokkuð ölvaðir. Samt virtist renna aðeins af þeim þegar þeir fundu að ljónynjan var að nema þá á brott. 

Mexíkó 1986

Árið 1986 var HM haldið í Mexíkó eftir keppni við Bandaríkin og Kanada um að fá mótið. Það var hins vegar annað land sem átti að halda keppnina fyrst. Hvaða land var það?

 

 

Sveitalaugar

Ég var ekki nógu duglegur í fyrra að heimsækja sveitalaugar en hef það sem af er þessu ári náð nokkuð góðum árangri. Það er því ekki seinna vænna en að dæma þessar laugar:

-Sundlaug Patreksfjarðar: Skelltum okkur í þessa laug eftir nokkuð rykuga keyrslu á Rauðasand og yfir í Látrabjarg í fyrra. Laugin er ný og er hluti af íþróttamiðstöð staðarins. Topplaug, sérstaklega þegar maður situr í pottinum og horfir út eftir Patreksfirði. 8 af 10

 

 

 

 

 

 

 

-Grettislaug á Reykhólum: Ég hef ekki hugmynd um af hverju þessu laug er kennd við Gretti en hún var byggð fyrir 60 árum og hefur staðist tímans tönn. Það eiga varla margir erindi til Reykhóla en á góðum degi má sjá fjöllin á Skarðsströndinni og Barðaströnd og út á Breiðafjörð. Við vorum hins vegar ekki þarna á svo góðum degi og þá er laugin í mesta lagi rétt fyrir ofan meðallag. 6,5 af 10

 

 

 

 

 

 

 

-Borg í Grímsnesi: Ný laug með fínni aðstöð, góðri laug og pottum og einni bestu rennibraut landsins. Útsýnið frá toppi brautarinnar er kalt og magnað. Fínt að prófa þessa á leið í eða úr bústað. 8 af 10

-Sundlaugin á Laugarvatni: La la sundlaug með sömu búningsklefum og notaðir eru í íþróttahúsinu. Stór mínus því það er óþolandi að vera hræddur um að bleyta gólfið þegar maður labbar út í laug. 6 af 10

-Hlaðir í Hvalfirði: Þokkaleg sveitalaug í nágrenni borgarinnar. Aðkoman er dálítið lík gömlu Kópavogslauginni þar sem maður labbar niður stiga þegar farið er til búningsklefa en gömlu Kópavogstöfrarnir eru hins vegar víðs fjarri, blessuð sé minning þeirra. Pottar yfirfullir og laugin ekki meira en sæmileg. 6 af 10

-Laugar í Sælingsdal: Fín laug í Hótel Eddu/skóla komplexi. Heiti potturinn kannski aðeins of lítill en það er smá 1981 "það er meiri gæinn þessi Prins póló" stemmning á staðnum, einkum tjaldstæðið og hótelið. 7,5 af 10

 

 

 

 

 

 

 

 

-Laugahóll í Bjarnafirði: Gvendarlaug hins góða heitir þessi og rekur söguna allt aftur til 12. aldar. Afburða sveitalaug af nokkrum ástæðum. Heita vatnið kemur beint úr röri sem liggur á bakkanum, hún er opin allan sólarhringinn en búningsaðstaðan er samt mjög fín og laugin sjálf er vel heit. Einstakt að skella sér í hana á miðnætti á fallegu sumarkvöldi og ekki síðra að fá að svamla í henni ein snemma morguns. Saknaði samt heitra potta sem hefði getað skipt máli á kaldari degi. 9,5 af 10

 

 

 

 

 

 

 

-Sundlaugin á Drangsnesi: Ágætis laug með frábæru útsýni. Laugin samt dálítið köld og pottarnir litlir og fullir af mjög leiðinlegum annarra manna börnum. Toppurinn  er samt frumleg stafsetningarhefð heimamanna, "Engin ábirgð tekin á munum",  "For staff onlý" og "Gufubað/Souna". 7,5 af 10

 

 

 

 

 

 

 

-Krossneslaug: Þessi hlýtur að vera ein af topp fimm sveitalaugum landsins. Stórkostleg staðsetning í fjöruborðina á hjara veraldar. Laugin sjálf er hlý og fín en svo hefur verið bætt við vel heitum potti en þaðan er útsýnið ekkert. Þoka og norðanátt spillti aðeins fyrir sem og jeppafólk sem brunar með látum yfir sjávargrjótið en þetta er ekta. 9 af 10

 

 

 

 

 

 

 

-Sundlaugin á Hólmavík: Glæný og satt að segja glæsileg laug. Frábærir heitir pottar og fín laug. Öll aðstaða til fyrirmyndar. Eini mínusinn er skortur á útsýni. 8 af 10

Once in a lifetime

Mæli með því að þeir sem hafa áhuga á poppmenningu, fótbolta og New York lesi Once in a lifetime, sem fjallar um sögu New York Cosmos frá 1971-1985. Það er í rauninni ótrúlegt að lesa um fóboltalið í Bandaríkjunum sem var meira í fréttum en Yankees, Metz, Giants og Knicks og voru þar að auki mestu stuðboltarnir á djamminu. Kannski ekki skrýtið þar sem búið var að safna Pele, Beckenbauer, Carlos Alberto og Giorgio Chinaglia (sem er kannski ekki mjög þekktur í dag en var súperstjarna á Ítalíu og í Bandaríkjunum) saman í eitt lið.

Það segir kannski nokkuð um stemmninguna að áðurnefndur Chinaglia geymdi viskí, sígarettur og forláta silkislopp í skápnum sínum á vellinum auk þess sem kynlífshneyksli var daglegt brauð. 

Ekki fjarri lagi að ímynda sér Hugh Hefner reima á sig takkaskóna.

Líf Cosmos var hins vegar ekki alltaf dans á rósum, þvert á móti. Í byrjun spilaði liðið á lélegum grasvelli í e-u úthverfi New York. Þegar Pele kom til liðsins var fyrsti leikurinn hans á þessum velli og til að líta betur út í augum Brasilíumannsins var yfirborðið spreyjað með grænni málningu. Í hálfleik hélt Pele að hann væri kominn með alvarlega sýkingu þar sem lærin voru þakin grænum flekkjum. Tveimur árum síðar voru þeir hins vegar búnir að færa sig yfir á Giants stadium þangað sem að meðaltali mættu um 60.000 manns en hápunktinum var náð þegar tæplega 80.000 manns sáu lokaleik Pele 1977. Eftir þetta lá leiðin hægt og rólega niður á við þar til síminn var tekinn úr sambandi árið 1985. Í dag er óljóst hver á réttinn að félaginu.

Fjörið var að mestu fjármagnað með peningum Warner samsteypunnar, ekki síst þeim ofsagróða sem Atari skilaði með spilakössum og tölvuleikjum í kringum 1980. Betri verður retró stemmningin ekki.